भांगरभूंय | प्रतिनिधी
म्हापशें, प्रतिनिधी ः नास्नोळा हो गांव सिरसय जिल्हो पंचायत मतदारसंघांतल्यान हळदोणें मतदारसंघांत आस्पावन घेवचो असो थाराव एकमतान पंचायत ग्रामसभेंत संमत जालो. ह्या वेळार मुखेल वेंचणूक अधिकारी आनी सरकाराक हे संबंदी पत्र सादर करपाचें थारायलें.
सरपंच फ्रेडी फर्नांडीस हांच्या अध्यक्षते खाला नास्नोळा ग्रामपंचायतीची ग्रामसभा आयतारा जाली. पंचायत सचीव रंजना राऊळ हांचे सयत पंच वांगडी हाजीर आशिल्ले.
थळावे नागरीक अमित नायक हांणी सिरसय जिल्हो पंचायत मतदारसंघाचो मुद्दो मांडलो. नास्नोळा गांवाचो आस्पाव केलो. पूण हाचो थळाव्यांक फायदो जालो ना. ते खातीर नास्नोळा गांव हळदोणां जिल्हो पं. मतदारसंघांत आस्पावचो असो प्रस्ताव तांणी ग्रामसभेंत मांडलो. सगळ्या थळाव्यांनी ह्या प्रस्तावाक तेंको दिलो.
गांवचो कोयर वेवस्थापन आनी भाडेकारांच्या मुद्द्यावयल्यान पंचायत मंडळाक धारेर धरलें. सुरवेक सरपंच फर्नांडीस समाधानकारक जाप दिवंक शकले ना. ते उपरांत येत्या सप्टेंबर मेरेन भाड्याच्या घरांचें सर्वेक्षण करतले अशें तांणी आश्वासन दिलें.
कोयर उडयतात त्या ब्लॅक स्पॉट्साचे समस्येचेर उपाय म्हूण ह्या सुवातेर सीसीटीव्ही कॅमेरे लावपाचो प्रस्ताव मान्य जालो.
तशेंच गोंय राज्य भाशा कायद्यांत दुरुस्ती करून देवनागरी आनी रोमन लिपीक समान दर्जो दिवपाचो थाराव ग्रामसभेत मंजूर केलो. 2023-24 वर्साचो प्रशासकीय अहवाल ग्रामसभेंत सादर केलो आनी पाळीव सुण्यांचो कर, किओक्स कर आनी सायकल कर माफ केलो.
जळारां पसून जावपी दुयेंसां आळाबंदा हाडपाक पंचायत मंडळान घरां घरांनी वचून तपासणी करपाचो निर्णय घेतला अशें पंचायत वांगडी सतीश गोवेकार हांणी ग्रामसभेंत सांगलें. कारण गांवांत व्हड प्रमाणांत दुयेंती सांपडटात. सगल्या थळाव्यांनी आपली सुवात निवळ दवरून बिराडाक रावपी लोकांची नोंदणी करून पंचायत आनी प्रशासनाक सहकार्य करचें असो उलो तांणी ह्या वेळार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
