भांगरभूंय | प्रतिनिधी
मुख्यमंंत्र्यां सयत वकील, मानेस्तांनी उक्तायलें दुख्ख
पणजी : देशाचे आदले अतिरिक्त सॉलिसिटर जनरल, आदले अॅडव्होकेट जनरल तशेंच नामनेचे आदवोगाद मनोहर उजगांवकार हे शुक्रारा संंवसाराक अंतरले. सांंत इनेज मसंडभुंंयेंत दनपारां तांंचे कुडीचेर निमाणे संंस्कार जाले. मुख्यमंंत्री डॉ. प्रमोद सावंंत, विरोधी पक्ष फुडारी युरी आलेमांव, आदले केंद्रीय मंत्री अॅड. रमाकांंत खलप, समेस्त आदवोगाद तशेंच मानेस्तांंनी दुख्ख उक्तायलां.
अॅड. मनोहर उजगांवकार हांंचो समाजीक तशेंच शिक्षणीक संंस्थांं कडेन लागींचो संबंद आशिल्लो. मनोहर उजगांवकार हांंचो जल्म 23 सप्टेंबर 1933 ह्या दिसा जालो. आल्तिनो लायसीयम संंस्थेंत कायद्याचे शिक्षण घेतले उपरांंत 1957 वर्सा आदवोगाद म्हूण तांंची नोंंदणी जाली. राज्यांतल्या सगल्या न्यायालयांंनी त्यांंनी आदवोगाद म्हूण अशिलाची बाजू मांंडल्या. मुंंबय उच्च न्यायालयाच्या गोंंय खंंडपिठान 1989 वर्सा ज्येश्ठ आदवोगाद म्हूण तांंकां पद दिलें. 16 सप्टेंबर 1996 ते 5 मे 1998 मेरेन ते देशाचे अतिरिक्त सॉलिसिटर जनरल आशिल्ले. 29 मार्च 1999 ते 1 ऑक्टोबर 1999 मेरेन ते राज्याचे अॅडव्होकेट जनरल आशिल्ले. गोवा लॉ टायम्स जर्नल ह्या नियतकालिकाचे ते 1989 ते 2008 मेरेन संंपादक आशिल्ले.
कायदो वाठारांत म्हत्वाचीं पदांं भुशोवपा सयत उजगांवकार हांंचो शिक्षणीक तशेंच समाजीक संंस्थांं कडेन संंबंंध आशिल्लो. कायद्याचो अभ्यासक आनी मार्गदर्शक अशी तांंची वळख आशिल्ली. देवस्थान कायदो तशेंच पुर्तुगेज कायद्याचे ते जाणकार आशिल्ले. ज्युनियर आदवोगाद म्हूण शेंकड्यांंनी आदवोगादांनी तांंच्या हाता खाला वावर केला. गोंंय तशेंच गोंंया भायर कायद्याचेर तांंची भाशणां जाल्यांत.
कायदाे वाठाराचे व्हड लुकसाण : मुख्यमंंत्री
मनोहर उजगांवकार हांंच्या मरणान कायदो वाठाराचें व्हड लुकसाण जालां. हांंव तांंच्या कुटुंबियांं प्रती दुख्ख उक्तायतां अशें मुख्यमंंत्री डॉ. प्रमोद सावंत हांंणी दुखोवटाच्या संंदेशांत म्हणलां.
मनोहर उजगांवकार हांंच्या मरणान कायद्याच्या जाणकाराक गोंंय मुकलां अशें विरोधी पक्ष फुडारी युरी आलेमांव हांंणी म्हणलां.
गुरू, मित्र आनी मार्गदर्शकाक मुकलो : अॅड. रमाकांत खलप
ज्येश्ठ आदवोगाद मनोहर उजगांवकार हांंच्या मरणान राज्याचें लुकसाण जालांंच, म्हजें लेगीत लुकसाण जालां. गुरू, मित्र आनी मार्गदर्शकाक हांंव मुकलां अशें आदले केंद्रीय मंत्री अॅड. रमाकांत खलप हांंणी म्हणलां.
कायद्याच्या वाठारांत अॅड. उजगांवकार हांंचे कार्य आनी योगदान मोलादीक आनी यादींंत उरपा सारखें आसा. गोंंय सक्सेशन, स्पेशल नोटरी आनी इन्वेंटरी विधेयकाचो मसुदो तयार करपाक एम. एस. न म्हाका मजत केली. हांव कायदो मंत्री आसतना हें विधेयक तयार जालें. देशाचो कायदो मंत्री आसतना नागरी दंड संंहिता तयार करपाक एम. एस. न मजत केली. पुर्तुगीज समान नागरी कायदो, कुटुंबीक कायदे अणकारीत करपाचो वावर तांंणी केला.
एम. एस. म्हडल्यार एक संंस्था : आदले न्यायाधीश लवंदे
एम. एस. उजगांवकार म्हणल्यार एक संंस्था आसली अशे आदले न्यायाधीश लवंदे हांंणी म्हणलां. हांंवें ताचे सयत आदवोगाद म्हूण वावर केला. न्यायाधीश म्हूण तांचो युक्तिवाद आयकप ही एक खोशी आसताली. आदवोगादाक मार्गदर्शन करपा सयत तांंणी बरोच वावर केला, अशें लवंदे हांंणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
