भांगरभूंय | प्रतिनिधी
मुरगांवः वास्कोच्या विवीध वाठारांनी बेकायदो तरेन उबारिल्ल्या फळ- भाजये वांगडाच हेर दुकानां आड मुरगांव नगरपालिकेन मोहीम हातांत घेवन कारवाय केल्या. ताका लागून वाहनचालक आनी चलप भोंवपी लोकांनी पालिकेच्या कामाची तोखणाय केल्या. तशेंच पालिकेन वास्को वरुणापुरी राष्ट्रीय म्हामार्गाचे कुशीक उबारिल्ल्या फळ विक्रेत्यांची बेकायदो दुकानां मातये भरवण करून, थंयच्या दुकानां फाटल्यान आशिल्लो जुगार अड्डो लेगीत काडून उडयला. थंयच्या दुकानकारान आडसरां आनी हेर कोयर फाटल्यांतल्यान जुआरींत वचपी नाफ्ता पायपलायनी लागसार उडयिल्ल्यान व्हड दुर्घटणा जावं येता.
मुरगांव पालिके वांगडाच जुआरी आस्थापनान हें प्रकरण गंभीरतायेन घेवन नाफ्ता पायपलानी कडलो कोयर काडचो. तशेंच हे मुखार वरुणापुरी म्हामार्गा वटेन बेकायदो दुकानां उबारप्यांचेर पुलिसां वतीन कारवाय करची. ना जाल्यार 2011 त लागिल्लो तसो नाफ्ता पायपलायनीक लागून उजो लागून ह्या वाठारांत व्हड संकश्ट निर्माण जावं येता, अशें थळाव्या लोकांचें म्हणणें आसा. 2011त नाफ्ता गळटी जावन थंय उजो लागिल्लो. सुमार पांच म्हयने वास्को धाकतळे वाठारांत उज्यान आकांताचें रूप घेतिल्लें. तशेंच नाफ्ता उज्याक लागून खूब जाणांक आपलो जीव वगडावचो पडिल्लो. वरुणापुरी म्हामार्गा कुशीचे मातये भरवण केल्ल्या दुकानां फाटल्यान जो कोयर आसा तो काडचे खातीर मुरगांव म्हाल उपजिल्होधिकारी, मुरगांव नगरपालिका, वास्को उजो पालोवपी दळ, जुआरी आस्थापन आनी हेर संबंदीत विभागान ताकतिकेन पावलां उखलचीं, अशें थळाव्या लोकांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
