भांगरभूंय | प्रतिनिधी
मुख्यमंत्र्यांचो विद्यार्थ्यांक उलो
राजकारण्यांची दर पांच वर्सांनी परिक्षा
सेगीत शिकून अपडेट रावप गरजेचें
भांगरभूंय । प्रतिनिधी
पणजी : गोंयकारांक सरकारी नोकरी जाय आसता. खासगी कंपन्यांनी कोण काम करपाक पळयनात. मात खासगी कंपन्यांनी सरकारी नोकरे परस चड पगार आसता. गोंयकारांनी आतां शिफ्टींनी काम करपाची तयारी दवरपाक जाय. नाटक, कालो वा धालां खातीर सुटी मागपाची संवय बंद करपाक जाय, अशें मुख्यमंत्री डॉ. प्रमोद सावंत हांणी सांगलें.
वेर्णा उद्देगीक वसणुकेंत एके कार्यावळींत 500 विद्यार्थ्यांक नोकरेचीं ऑफर लॅटरां दिलीं. ह्या वेळार ते उलयताले.
आयच्या सर्तीच्या युगांत तिगून रावपा खातीर सगल्यांक शिकत रावन अपडेट रावपाची गरज आसा. राजकारण्यांक लेगीत दर पांच वर्सांनी परिक्षा दिवची पडटा. एक तर डिस्टींक्शन वा नापास हे दोनूच पर्याय राजकारण्यां मुखार आसता, अशें मुख्यमंत्री डॉ. प्रमोद सावंत हांणी सांगलें. एलडीसी, एमटीएस पदां उपरांत आतां लॅबोरेटरी असिस्टंट, इन्वेस्टिगेटर पदां खातीर लेगीत एक वर्साचो अणभव सक्तीचो करतले, अशें मुख्यमंत्री डॉ. सावंत हांणी सांगलें.
आयज बीए, बीकॉम अशो फक्त पदव्यो मेळोवन नोकरी मेळप शक्य जावचें ना. नोकरे खातीर एका क्षेत्रांत कुशळटाय मेळोवप गरजेचें. पदवी मेळयली वा नोकरी मेळ्ळी तरी सेगीत शिकत रावून अपडेट रावपाची गरज आसता. मंत्री, आमदार वा राजकारणी लेगीत सुखी आसनात. आमकां सगळ्यांक अपडेट रावचें पडटा. लोकां कडेन आयज हात आनी शिंव हे दोनूच पर्याय नात. हेर बरेच पर्याय उपलब्ध आसात, अशें मुख्यमंत्र्यांनी सांगलें.
आतां मेरेन 12 रोजगार मेळाव्यांतल्यान २ हजारां परस चड जाणांक नोकर्यो उपलब्ध जाल्यात.
कोयर वेवस्थापनाचेर आयटीआयन अभ्यासक्रम
आयटीआयन अंदूं सावन कोयर वेवस्थापन आनी उजो आनी आपत्कालीन वेवस्थापना विशीं अभ्यासक्रम सुरू जातलो. हेर बरेच अभ्यासक्रम सुरू करपाचो प्रस्ताव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
