भांगरभूंय | प्रतिनिधी
पणजी, बातमीदार : नागव्यां (बार्देश) एके व्यक्तीक आनी तिच्या णव वर्सां पिरायेच्या चल्याक मारपेट केल्ले खातीर हणजूण पुलिसांनी गुन्यांव नोंद केल्या उपरांत आतां गुंड टारझन पार्सेकार (रा. हडफडें) आनी सागर पाटील (रा. पर्रा) हांचो जामीन न्यायालयान रद्द केला. आदल्या एका प्रकरणांत सशर्त जामीन दितना मुंबय उच्च न्यायालयान टारझनाक उत्तर गोंयांत प्रवेश करपाक बंदी घाल्ली. हातूंतल्यो अटी मोडिल्ल्यान ताचो जामीन रद्द केला. तशेंच १७ मार्च मेरेन न्यायालयाक शरण येवपाचो आदेशूय जारी केला.
टारझनाचेर खुबशे गुन्यांव दाखल आशिल्ल्यान तो बंदखणींत आशिल्लो. गोंयच्या मुंबय उच्च न्यायालयांत ताणें जामीना खातीर अर्ज केल्या उपरांत न्यायालयान खुबश्यो अटी आनी सर्ती घालून ताका जामिनाचेर सोडिल्लो. तशेंच उत्तर गोंयांत येवपाक ताचेर बंदी घाल्ली. मात बिरेस्तार, ४ जानेवारीक सांजेवेळार सुमार ६ वरांचेर नागवेंच्या फुटसाल मैदाना लागसारा ताणें एका मनशाक आनी ताच्या णव वर्सां पिरायेच्या चल्याक मारपेट केल्ल्याचें प्रकरण मुखार आयलें. तो मनीस रवी शिरोडकार हांचो इश्ट. फाटल्या वर्सा १ ऑक्टोबराक नागोवा दुबावीत टारझन पार्सेकार हाचे टोळयेन तांचेर जिवघेणो हल्लो केल्लो. ताचो बदलो म्हणून ताणे ४ जानेवारीक हल्लो केल्ल्याचो दुबाव आसा. हे विशीं संबंदीत व्यक्तीन हणजूण पुलीशेंत कागाळ नोंद केल्या.
फुटसाल मैदानाचेर सरावा खातीर आयिल्ल्या आपल्या चल्याक व्हरपा खातीर कागाळदार आयिल्लो. तेन्ना वयले दोगूय दुबावीत थंय आयले. तांणी कागाळदाराक वायट उतरां दिलीं आनी मारपेट केली. कागाळदाराचो चलो बापायचे मजतीक धांवलो तेन्ना ताकाय दुबावितांनी मारलो. तशें आमदारा कडेन कागाळ केल्यार मारून उडोवपाचीय धमकी दिली, अशें कागाळींत नोंद केल्लें.
हणजूण पुलिशेंत शेनवार ता. ६ जानेवारी २०२४ दिसा हे विशीं कागाळ दाखल जाल्ली. ते प्रमाण पुलिसांनी दुबाविता आड भा.दं.सं.चे कलम ३२३, ५०४, ५०६(२) आनी ३४ तशेंच गोंय बाल कायदो कलम ८ खाला गुन्यांव नोंद केला.
मजगतीं, रवी शिरोडकार जिवघेणो हल्ल्या प्रकरणांत मुंबय उच्च न्यायालयान दुबावीत टारझन हाका उत्तर गोंयांत प्रवेश करपाक बंदी घालून सशर्थ जामिनाचेर सुटका केल्ली. न्यायालयाच्या आदेशाचो अपमान केल्ल्यान दुबाविताचो जामीन रद्द करपाची मागणी हणजूण पुलिसांनी उच्च न्यायालयाकडेन केल्ली. ते प्रमाण उच्च न्यायालयान आयज ताचो जामीन रद्द केलो. तशेंच १७ मार्च मेरेन न्यायालयाक शरण येवपाचो आदेशूय जारी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
