भांगरभूंय | प्रतिनिधी
म्हापशें, प्रतिनिधी ः नागव्यां जेसीबी आंगा वयल्यान गेल्ल्यान प्रशांत पवार (३०, रा. वेगासवाडो हडफड्यां, मूळ कर्नाटका) ह्या तरणाट्याक मरण आयलें. हो तरणाटो जेसीबीच्या सकयल न्हिदिल्लो.
हो अपघात शेनवारा सांजेवेळार सुमार ७.३० वरांचेर घडलो. नागवेंचे संदीप गॅरेजी लागसारा चालक जीए ०३ एएफ ०९६६ क्रमांकाची जेसीबी पार्क केल्ली. प्रशांत दिसवड्याचो कामगार. विसव घेवपा खातीर तो हे जेसीबी सकयल न्हिदिल्लो.
घडणुके वेळार जेसीबी चालक दुबावीत राजेंद्र श्रीकांत शिरोडकार (३८, रा. डायसवाडो, नागव्यां) हांणी ही जेसीबी सुरू करून फुडें व्हेली तेन्ना प्रशांत पोंदाक चिड्डलो. प्रशांत सकय न्हिदला हाचो अदमास जेसीबी चालकाक येवंक ना. उपरांत जखमी प्रशांताक उपचारा खातीर गोमेकाँत उपचारा खातीर दाखल केलो. उपचारा मजगतीं ताका मरण आयलें. पोस्टमार्टम अहवालांत मरण आयिल्ल्याच्या पोटा वयल्यान जेसीबीचो टायर वचून तो गंभीर जखमी जाल्ल्यान ताका मरण आयिल्ल्याचें दोतोरांनी नोंद केलां.
प्रशांताचो भाव अनिल पवार हाचे कागाळीच्या आदारार हणजूण पुलिसांनी दुबावीत जेसीबी चालक राजेंद्र शिरोडकार हाचे आड गुन्यांव नोंद केला. ताका अटक केली. म्हापशें न्यायालयान जामीनाचेर सोडलो. फुडलो तपास पुलीस उपनिरीक्षक रमेश हरिजन करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
