भांगरभूंय | प्रतिनिधी
भांगरभूंय । प्रतिनिधी
म्हापशेंः स्कूटरीन भुरग्यांक शाळेंत पावोवपाक वतना नागवा हांगा स्कूटरीक एके गाडयेन धफको दिल्ल्यान जाल्ल्या अपघातांत जॉन डिसोझा (53, नागवा) हांका मरण आयलें जाल्यार तागेली आल्विटो (11) आनी एलिस (15) ही भुरगीं जखमी जालीं.
काल शुक्राराक सकाळीं 7.45 च्या सुमाराक हो अपघात जालो. जॉन डिसोझा आपल्या दोन भुरग्यांक सदचे प्रमाण जीए 03 एए 8091
हे स्कूटरीन शाळेंत पावोवपाक वतान नागवा सर्कला लागीं आशिल्ले ट्रीनिटी चर्ची लागीं फाटल्यान येवपी जीए 03 डब्ल्यू 7817 हे रेन्ट अ कॅब गाडयेन तिका धपको दिलो. गाडयेंत गुजरातल्यान आयिल्ले पर्यटक आशिल्ले.
गाडयेचो धपको बसतगीर स्कूटर रस्त्या कुशीक आशिल्ल्या घऱाचे गेटीचे शिमिटाच्या खांब्याक आपटून सकल पडली. जॉन डिसोझा आनी भुरगीं जखमी जालीं. म्हापशें जिल्हो हॉस्पिटलांत तांकां व्हेलीं तेन्ना दोतोरान जॉन डिसोझा मेल्ल्याचें जाहीर केलें. चली एलिसाक उपचार करून घरा धाडलें जाल्यार चलो आल्विटोच्या पायांक दुखापत जाल्ल्यान तांचेर उपचार थंय उपचार सूरू आसात.
अपघाताक कारण थारल्लो ड्रायव्हर पौषक जतिनकुमार शाह (वडोदरा, गुजरात) हाचे आड हणजूण पुलिसांनी गुन्यांव दाखल करून ताका अटक केली. जॉन डिसोझा पयलीं एके खण कंपनीत कामाक आशिल्लो. मात खण वेवसाय बंद जाल्या उपरांत ताणे टॅक्सी घेवन भाडीं मारपाक सुरवात केल्ली. घरांतलो जोडपी दादलो गेल्ल्यान ताच्या कुटूंबाचेर हावळ आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.