भांगरभूंय | प्रतिनिधी
पणजीः गोंय लोक सेवा आयोगान गोंय नागरी सेवेंतले कनिश्ठ श्रेणी अधिकार्याच्या पदा खातीरची पूर्व-चांचणी परिक्षा जाहीर केल्या. आयोगा वरवीं ही परिक्षा १३ जून ते १४ जून २०२६ ह्या काळा मजगतीं घेतले. तशेंच हे परिक्षे खातीरची हॉल टिकेट ८ जून सावन जारी करपाक सुरवात जातली, अशी कळोवणी आयोगान जारी केल्या.
आयोगान कळीत केलां, उमेदवारांनी तांचे हॉल तिकिटाचेर नमूद केल्ल्या अहवालाच्या वेळा पयलीं नियुक्त केंद्राचेर पावपा खातीर स्वताची वेवस्था करची. उमेदवारांक फुडल्या तपशिला खातीर तांणी तांचो ई-मेल तपासचो. तशेंच जांकां ७ जून मेरेन आपली हॉल तिकीट डावनलोड करपाक मेळूंक ना, तांणी आपली हॉल तिकीट मेळोवपा खातीर ८ जून ते ११ जून मजगतीं कार्यालयीन वेळांत आपल्या वळख पुराव्या सयत आयोगाचे कचेंरेंत वयक्तीक रितीन हाजीर रावचें. हॉल तिकीट नाशिल्ल्या उमेदवारांक सीबीआरटी दिवपाची परवानगी मेळची ना.
गोंय नागरी सेवेंतली कनिश्ठ श्रेणी अधिकार्याचे पूर्व-चांचणी परिक्षे खातीर किमान पास टक्केवारी श्रेणी प्रमाण निश्चीत केल्या. सर्वसादारण, ईडब्ल्यूएस आनी आदले सैनीक खातीर पास टक्केवारी ६५% (६० तले ३९ गूण) आसतली. ओबीसी, पीडब्ल्यूडी आनी सीएफएफ खातीर पास टक्केवारी ६०% (६० तले ३६ गूण) आसतली. तर एससी आनी एसटी खातीर पास टक्केवारी ५५% (६० तले ३३ गूण) आसतली.
आयोगान उमेदवारांक खर कळोवणी दिल्या, तांणी नियुक्त केल्ल्या केंद्राचेर वेळांत पावपा खातीर आपल्या घरांतल्यान फावोश्या वेळे आदीं भायर सरचें जाका लागून नियुक्त परिक्षा केंद्रांत वेळार पावपाक शकतले. चालू आशिल्ल्या एनएच-६६च्या उड्डाण पुलाचें काम आनी पावसाक लागून उदक सांचपाचे प्रकार जातले, ताका लागून येरादारीक उशीर जावपाक शकता. खंयचेच परिस्थितींत निर्धारीत अहवाल दिवपाच्या वेळा उपरांत उमेदवारांक प्रवेश दिवचे नात. वेळार प्रवास करप ही पुरायपणान उमेदवाराची स्वताची जबाबदारी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
