भांगरभूंय | प्रतिनिधी
गोंय, महाराष्ट्र, कर्नाटका सयत आंध्र प्रदेश पुलिसांचो दोळो ह्या चोराचेर
जोयडा, प्रतिनिधी : गोंय, कर्नाटक, महाराष्ट्र हांचे सयत आंध्र प्रदेश पुलिसांचो दोळो आशिल्लो नांवाडगो चोर ख्वाजा अस्लम हो बेळगांवच्यान पळून गेला. बेळगांवां माळमारुती पुलीस स्टेशनाच्या पुलिसांनी ताका धरपा खातीर सांपळो रचिल्लो. मात ताची सुलूस लागना फुडें तो थंयच्यान पळून गेलो.
बेळगांवची सत्यसाई कॉलनी वैभवनगर हांगा रावपी ख्वाजा अस्लम उर्फ रफिक सय्यद उर्फ शेख (३२) हो नांवाडगो चोर. खुबश्या राज्यांनी तांणी धुमशेणां घातल्यांत.
बुधवारा रातीं तो अमननगरांत आयिल्ल्याची म्हायती माळमारुती पुलिसांक मेळिल्ली. ताका लागून पुलीस उपनिरीक्षक श्रीशैल हांच्या फुडारपणा खालच्या आठ- धा जाणांच्या पंगडान ताका धरपाची तयारी केल्ली. मात हाची त्या चोराक सुलूस लागिल्ल्यान ताणें आपली दुचाकी थंयच उडोवन थंयच्यान पळ काडली.
ख्वाजा अस्लम हाचेर बेळगांव जिल्हो, गोंयांत सुमार वीस परस चड घरां फोडिल्ल्याचीं, वाटेर चोरयो केल्ल्याचीं प्रकरणां नोंद आसात. भायर चोरयो करून तो बेळगांवां लिपपा खातीर येतालो. चोरये वेळार तो स्वता कडेन धार आशिल्लीं शस्त्रांय दवरता अशें स्पश्ट जालां. हो नांवाडगो चोर आशिल्ल्यान तो खंयूय दिसल्यार लागींच्या पुलीस स्टेशना कडेन संपर्क करचो असो उलो बेळगांव पुलीस आयुक्तान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
