भांगरभूंय | प्रतिनिधी
नवी सकाळ… नवी उमेद… नवी सपनां… नवे ठराव… नवीं आव्हानां… सगलीं जाणा नव्या वर्साची उमळशिकेन वाट पळयतात. नव्या वर्साच्या येवकारा खातीर प्लॅन करतात आनी एकामेकांक नव्या वर्साचीं परबीं भेटयतात. जगांतलो चडसो लोक राती बाराच्या ठोक्यार नव्या वर्साक येवकार दितात आनी नव्या वर्साची पयली सकाळ मनमेकळी सारतात. नव्या वर्साच्या पयल्याच दिसाक चडशा जाणांक सुटी आशिल्ल्यान आपल्या मनशां वांगडा सुशेगाद आसतात. आनी फुडले वाटचालीची तयारी करतात. नव्या वर्साक नव्या रुपान पळयतात आनी आपल्याचेरूच कांय बंधना घालून घेतात. नव्या वर्साक नवे उमेदीन येवकार दितात.
2019 च्या 31 डिसेंबराकूय लोकांनी एकठांय येवन व्हडा दबाज्यान 2020 सालाक येवकार दिल्लो आनी नव्या दसकांत उमेदीन पावल दवरिल्लें. पूण 2020 वर्स एक वेगळेंच रूप घेवन आयलें आनी जग आरतें परतें केलें. कोणें केन्नाच चिंतूंक नासलें अशें दीस आयले. घरचीं लागीं आयलीं तशीच एकामेकां कडल्यान पयसावलींय. ह्या काळान मनशाची वेगवेगळीं रुपांय दाखयलीं. ओडून घेतिल्ले मुखवटे पयस सारले आनी आपले भितर झाकून पळोवची संदय दिली. पूण लोकांनी धीर सोडलो ना.
2021 वर्स आयलें तेन्ना लोकांच्या मनांत एक आस तयार जाली… ह्या कोविडाच्या आकांतातल्यान आमी सगळीं भायर सरतलीं हे आशेन परतून एकदा लोकांनी नव्या वर्साक येवकार दिलो. लोक हळू हळू भायर सरूंक लागले. एकामेकांगेर वचूंक लागले. ह्या सगळ्याचेर आमी जैत मेळयतलेंच ह्या हावेसान पावलां उबारूंक लागले. पूण त्याय वर्सा खूब जाणांच्या पदराक फक्त निरशेणी आयली. एक भिरांकूळ ल्हार आपले वांगडा निश्पाप लोकांक घेवन गेलें. सगळ्यांक हालोवन घालें. मनशाचो विस्वास दळमळीत जावंक लागलो. ह्या काळांत खूब जाणांचें बरेंय जालें आनी खूब जाणांक लाभय जालो.
2021 वर्स सोंपत आयलें आनी परत एकदा दिसलें 2022 सगळे निवळायतलें आनी ह्या खेपे मात लोकांचो विस्वास खरो थारलो. सुरवातीक दिसलें की कोवीड परत खेळ मांडटा पूण म्हयने मुखार वतात तशें सगलें एक एक करून सगळें जाग्यार पडूंक लागलें. कोवीड काळ जसो येवंकूच नासल्या वरी लोक वावरूंक लागले. आनी खरेंच सगळे परत रुळार येवंक लागले.
परिस्थिती अशी कित्याक आयली हाचे परस ती आमी कशी हाताळ्ळी आनी परिस्थितीचेर जैत कशें जोडलें हें म्हत्वाचें थारता. वर्स सुरू कशें जालें तें म्हत्वाचेंच पूण तें आमी सारले कशें, तेंय तितलेंच म्हत्वाचें.
आपले जिणेंत लेगीत खंयचीय परिस्थिती कित्याक आयली ह्या प्रस्नाची जाप सोदचे परस आयिल्ल्या परिस्थितीक आमी तोंड कशें दिलें हें पळोवप गरजेचें थरता. हांवें सावदींत काडिल्ल्या दिसांची म्हाका याद लेगीत काडपाची नासताली पूण पुस्तक बरोवंक घेतलें आनी ते वाटचालीचेर एक नदर पडली तेन्ना म्हाका तें दसक हांवें तोल सांबाळीत कशें हुपलें हाची जाणीव जाली. त्या दसकांत हांव खूब कितें शिकलें. परिस्थिती फक्त शिकयता आनी मनीस घडयता.
पांटल्या पोंदा धांपून दवरिल्ले फडफडट्या कोंबयेक पांटलो उगडून मेकळो स्वास दिलो जाल्यार ती हांगा थंय धांवत सुट्टा. 2022 वर्स सोंपत आयलें तशें आमकांय मेकळो स्वास घेवंक मेळळो. कांय लुकसाणाची भरपाय करप शक्य नासलें पूण आपल्या हातांत आशिल्ले सगळे परत जाग्यार हाडचे खातीरचो यत्न कोणेंच कमी पडूंक दिलो ना. जमता तें सगलें जमायलें आनी नेटान पावलां घालीं.
म्हणटां म्हणटां 2023 वर्स उजवाडलें. म्हाका सदांच दिसतालें… कितें फरक आसा नव्या वर्सांत आनी गेल्या वर्सांत? फक्त तारीख बदलता… पूण ना… फाटीं वळून पळयतां तेन्ना फरक जाणवता. ह्या वर्सा मेरेनचो खडबडीत रस्तो हुपून आयिल्ल्याची ती वाटचाल दोळ्या मुखार येता आनी तेन्ना नव्या वर्साक नव्यान घाल्ल्या पावलांची जाणीव जाता. सगलें तेंच आसलें जाल्यार लेगीत नवें वर्स एक उमेद घेवन येता, कितेंय नवें करून दाखोवपाची उमेद… आत्मविश्वास तिगोवपाची उमेद… आनी काळजांत पेटत दवरिल्ले ते वातीक पालोवंक दिनासताना पेटत दवरपाची उमेद!
म्हजे एके कवितेंतल्यो कांय ओळी याद जाल्यो.
हांसतात गेल्ले दीस म्हजेर…’फालें कोणे पळयला?
आयचो दीस जगना जाल्यार…सांग तूं कितें जियेलां?’
‘जिवताचे सत स्विकार…पावलां फक्त मार मुखार
आयचो दीस लाय पणाक…खेळ जिविताचो हो जुगार’
वर्सां फाटल्यान धांवत हांवें…खरेंच वर्सां घालीं फाटीं
खूब कितें उरलां करचें…कानांत म्हज्या वाजती घांटी
ह्या नव्या वर्साक आनिकूय नेटान येवकार दिवया. खूब करचें उरलां. येतल्या बऱ्या वायट ल्हारांचेर उफेवंक शिकुया आनी फुडें सरचे खातीर जैताचे वाटेर हात पांय मारीत रावया.
रुपाली मावजो किर्तनी
00971506890867
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
