भांगरभूंय | प्रतिनिधी
भुरगेपणा सावनच एक गजाल आमच्या मनाचेर कोरांतलेली आसता. ती म्हणल्यार, खूब अभ्यास करप, पाठांतर करप, प्रगती करप, पदव्यांचो दोंगर करप अशें चालू आसता. तशें केल्यार बरी नोकरी, बरो पगार आनी बरो फुडार जातलो. ह्या भ्रमांत आमी आसतात. आपल्या तांकीचो विचार जायना. कामाक जाय आशिल्ली म्हायती ,कुशळटाय हाचो विचार जायना.
पदव्यो घेतकीर आमच्या ज्ञानांत भर पडटा. नवी नवी म्हायती मेळटा. त्या ज्ञानाचें म्हायतींत आनी म्हायतीचें रूंपातर कुशळटायेंत जाता व्हय? ताचो जिणे खातीर उपेग जाता व्हय?.
दर एका कामाक, वेवसायाक योग्य कुशळटाय लागता. तें आपणावचें पडटा. तशें जायना देखून शिक्षण आनी रोजगार हाची गॅप वाडटा. पाठांतर करून जाय तशें ज्ञानांत भर पडना. शिक्षणाचो आत्मो ताका कळना. देखून इंजिनियरींगांत बरे मार्क घेवन पास जाल्ल्यांक कामाक योग्य ना म्हणून कामाच्या सुवातेर प्रशिक्षण दिवचें पडटा. सरळ ज्यूर आनी कंपावंड ज्यूर हाचो फरक कळलो ना जाल्यार वर्सा कणकणी रीण फारिक करचें पडटा.ऑटोमोबायल इंजिनियर जाल्या भुरग्याक मोटर सायकलची सादी दुरुस्ती करूंक येत म्हूणून सांगूंक येना. बी कॉम जाल्ल्या पदवीधरांक सादे अकावंट योग्य तरेन बरोंवक येत म्हण सांगूक नज. देखून कुशळटाय आशिल्ल्या शिक्षणाक म्हत्व आसा.
आपणें फुडाराक कितें करप ताचो हुस्को विद्यार्थ्यां वांगडाच ताच्या पालकांकय आसता. देखून काळाबरोबर वाडत वचपी संदी आनी पर्यायान वाडपी शिक्षणीक अभ्यासक्रम हांची पुराय म्हायती आसप गरजेचें. अशावेळार योग्य अभ्यासक्रम सोदपा खातीर तांकीची चांचणी करप गरजेचें. हातूंत अंकगणीत, यांत्रिक, उतरावळ, भाशा, संवाद ह्या आनीक बऱ्याच तांकीची तपासणी जाता. एके चांचणी मदीं 8 ते 10 उपचांचण्यो आसता. खंयच्यो योग्य तें थारावप आसता.
2) व्यक्तीमत्वाची चांचणी-विद्यार्थ्यांचें व्यक्तीमत्व कशे तरेचें आसा. तें अंतर्मुख आसा. ताका चोम्यांनी वावुरपाक आवडटा की तो एकलकोंडा,असले प्रस्न उप्रासता.
3) आवड चाचणी -विद्यार्थ्यांक कित्यान आवड आसा.तें पळवप.ताका मनशांमदीं काम करपाक आवडटा. ताका तंत्रीक मळार ,वा लेखन,वा हेर कला आवडटात. ताचो सभाव आनी आवड हांचे मदलो मार्ग सोदून काडप आनी ताका योग्य कुशळटाय आपणावपाक, प्रशिक्षण दिवपाक, मजत जाता. हातूंतल्यान एक दिशा मेळटा, हें शंबर टक्के तशेंच जातलें अशें न्हय. खर इत्साशक्तीच्या बळार बऱ्याच मनशांनी चमत्कार घडयल्यात. शिकप अर्दवट सोडून मुंबयंत आयिल्ले अदानी ग्रुपाचे संस्थापक गौतम अदानी हांणी आयज जगांतल्या सगल्या व्हड उदयेगांमदें आपली सुवात निर्माण केल्या. रिलायन्स उदेयगाचे संस्थापक धीरुभाई अंबानी हाचें शिक्षण फक्त धावी मेरेन जाल्लें. येमेन हांगा पेट्रोल पंपाची नोकरी केली आनी उपरांत भारतांत येवन एका म्हान उदयेग साम्राज्याची बुनयाद घाली.
भारतांत कुशळटाय आधारित शिक्षणाचो विचार राष्ट्रीय शिक्षण धोरण 2020त जाला. 1937 वर्सा महात्मा गांधीजींच्या ‘नई तालीम’ ह्या संकल्पनेन हाची बुन्याद घाली आनी तीन दशकां उपरांत कोठारी आयोगान ताका संस्थात्मक रूप दिवपाचो प्रयत्न केलो.
कुशळटाय विकास धोरणाचो भाग जावच्या आदीं गांधीजीन उत्पादक काम हें शिक्षणाचें केंद्र आसपाक जाय अशें सांगिल्लें. ‘नई तालीमे’न हस्तकले वरवीं शिक्षण, स्वावलंबन, श्रमाची प्रतिश्ठा आनी चारित्र्यनिर्मितीची सांगड घाली.
1964-66 च्या कोठारी आयोगान शाळांनी कार्यानुभव शिक्षणाचो अविभाज्य भाग करपाची शिफारस केली आनी माध्यमीक शिक्षणांत वेवसायिक शिक्षणाक चालना दिवपाचें सुचयलें. पूण सुविधा, शिक्षक प्रशिक्षण आनी समाजाची पदवीकडेन झुकाव म्हणून अंमलबजावणी मर्यादीत उरली.
राष्ट्रीय शिक्षण धोरण 2020 हें शिक्षण आनी रोजगारक्षमताय हांच्यांतली गॅप भरून काडपाचो सर्वांत महत्त्वाकांक्षी प्रयत्न आसा. माध्यमीक शाळेपासून कुशळटाय शिक्षण, इंटर्नशिप, भोवविशयक शिक्षण आनी उच्च शिक्षणांत लवचिकतेक प्राधान्य दिलें. राज्यां प्रमाण अंमलबजावणी वेगवेगळी दिसता. कर्नाटक उद्योग भागीदारींत मुखारआसा; महाराष्ट्रान तांत्रिक शिक्षण उद्योगां कडेन जोडलां; मध्य प्रदेशान सुधारणा वेगान राबयल्या; गुजरातान उद्योजकतेक चालना दिली; ओडिशान वेवसायिक शिक्षण मजबूत केलां.
गोंयांत राष्ट्रीय शिक्षण धोरण पांवड्या- पांवड्यांन लागू केलां. शाळांत वेवसायिक शिक्षण, कला शिक्षण आनी आंतरविद्याशाखीय अभ्यासाचो आस्पाव जाला. तर उच्च शिक्षण संस्थांनी भोवविशयक अभ्यासक्रम आनी कौशल्याभिमुख कार्यक्रम आपणायल्या. हें प्रगतिशील पावल आसलें तरी दीर्घकालीन येस गुंतवणूक, शिक्षक प्रशिक्षण आनी उद्योग भागीदारीवचेर अवलंबून आसता.
भारतांत आदीं सावन दूरदृश्टीचें शिक्षणिक विचार आशिल्ले. राष्ट्रीय शिक्षण धोरण 2020 चें येस फकत धोरणार ना, तर शाळा, सरकार, उद्योग आनी समाजात शिक्षण हें फकत परिक्षे खातीर ना तर जिणे आनी कामा खातीर तयार करपाक आसा हें मान्य करपाचेर अवलंबून आसता.
वामन रा. नायक
9922445059
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
