भांगरभूंय | प्रतिनिधी
पुरातत्व खात्याचे मंत्री सुभाष फळदेसाय हांची म्हायती
पणजीः फाटल्या 4 वर्सां सावन पुरातत्व खात्यान 7 नवी स्मारकां इतिहासीक म्हत्व म्हूण संरक्षीत स्मारकां/वाठार म्हूण घोशीत केल्यात. ह्या स्मारकांतलो वाठार बफर झोन घोशीत करून हाचेर पाळत दवरपा खातीर सुरक्षा रक्षकांची नेमणूक जाल्या अशी म्हायती पुरातत्व खात्याचो मंत्री सुभाष फळदेसाय हांणी विधानसभेचे लेखी जापेंत दिली.
इतिहासीक म्हत्व म्हण पुरातत्व खात्यान नवी कितलीं स्मारका संरक्षीत स्मारकां जाहीर केल्यांत असो प्रस्न वेळ्ळीचे आमदार क्रुझ सिल्वा हांणी विधानसभेंत मांडिल्लो. हाचेर जाप दितना मंत्र्यान सांगलें की गोंयच्या वेगळ्यावेगळ्या वाठारांतलीं सात इतिहासीक स्मारकां आनी थळां ह्या वर्सा 15 फेब्रुवारीक संरक्षीत वाठार म्हूण राजपत्रांतल्यान घोशीत जाल्लीं.
ह्या सात वाठरांत केपेंचो बेतूल किल्लो, सत्तरीचो नाणूस किल्लो, सत्तरी म्हावशीचे फातरा वेले कोरीव काम, काणकोण बादे वाठारांतलो वाटकुळो फातर, कुंभारखड सत्तरीतले क्रांतीवीर दिपाजी राणे हांचे घर, खोला काणकोणचे सोलीयें देवूळ, बाळ्ळी केपेंच्या शांतादुर्गा बाळ्ळीकान्न संस्थानांतले वझरेश्वर देवळाची टांकी ही संरक्षीत वास्तू म्हूण घोशीत जाल्यात.
जीं थळां अधिसुचीत जाल्यांत त्या सगल्या स्मारकांचे तशेच थळांचे, तेच बरोबर तांचें सध्या अस्तित्व खंयचे स्थितींत आसा हांचें सत्यापन सरकारान केलां.
पुरातत्व खात्याच्या संरक्षीत स्मारकां/वाठारां खातीर जमीन उदरगत आनी बांदकाम नियंत्रण 2010 खाला कलम 6-ब, 2 (ब) आधाराचेर ह्या वाठारांत बफर झोन नियंत्रीत क्षेत्राची अंमलबजावणी केल्या.
वेगळ्यावगेळ्या वाठारांनी स्मारक अटेंडंट तैनात केल्यात. तशेंच गोंय मनीस संसाधन उदरगत म्हामंडळा वतीन खात्यान संरक्षीत स्मारक/थळांत युटीलीटी अटेंडंट आनी सुरक्षा सरक्षक तैनात केल्यात, अशी म्हायती सुभाष फळदेसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
