भांगरभूंय | प्रतिनिधी
भांगरभूंय । प्रतिनिधी
पणजीः कर्लस मराठी चॅनला वयले ‘सूर नवा ध्यास नवा’ हे संगीत सर्तींतल्यान निमणे फेरयेंत बायणा-वास्कोचो नवाब शेख भायर पडिल्ल्यान सगल्या गोंयकारांचो सामको विरस जालो. आयतारचे हे फायनींत नवाब चॅम्पियन जातलोच हाची खात्री सगळ्यांक आशिल्ली. वास्को शारांत ते खातीर व्हडल्यो स्क्रिनी लावून ही कार्यावळ पळोवपाची वेवस्था केल्ली. मात नवाब जिखपाक शकलो ना देखून सगळ्यांक गोंयकारांक वायट दितलें.
हे सर्तींत व्हिको वज्रदंती बेस्ट परफोर्मर तशेंच चांदीची कट्यार जिखून तशेेंच म्हा अंतिम फेरयेत पयलींच प्रवेश करून सर्त जिखपाची उमेद नवाबान तयार केल्ली. फायनलींत ‘कट्यार काळजांत घुसली’ ह्या सिनेमांतले रागदारीचेर आदारीत सरगम पद तशेंच सैराट सिनेमातले झींग झींग झिगट हे पद म्हणून जे तयारेन ताणे म्हणले ताका लागून तो चॅम्पियन जातलो अशें दिसतालें. मात परिक्षक महेश काळे आनी अवधूत गुप्तेन उत्कर्ष वानखेडेच्या वटेन कौल दिलो. संज्योती जगदाळे आनी आरोही प्रभुदेसाय ही रनरअप थारली. हिंदी भाशक आशिल्लो नवाब जिखल्लो जाल्यार सूर नवा ध्यास नवा सर्तींतलो तो एक इतिहास थारताशिल्लो हें मात खरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
