भांगरभूंय | प्रतिनिधी
कला अकादमी नवी ताल्ल जातना मांडवी न्हंयेचेर, पणजेंतल्या दुसऱ्या नरीमन पाॅयंटार बांदकाम कंपन्यांनी एक नदर दवरची. मांडवी न्हंयेक धपको लागल्यार शार पुरायपणान उदका खाला वचूं येता, हें मतींत दवरूनच नवनिर्मणे कडेन पळोवचें. दुसऱ्या नरीमन पाॅयटांच्या कांपाला वेलो वावर लागीं- लागीं पुराय जाता आसतना कला अकादमीचे न्हंयचे देगे वयलें बांदकाम कित्याक तोडलें काय? दुसरे वटेन कांपाल नरीमन पाॅयंटार घाल्ली फातरांची वंय गरजे भायर वाडयनात, अशें समजूया. वंयेंक मर्यादा आसपाक जाय. ती लांबयल्यार मांडवी रागार जावं येता. नवनिर्मणेत कांय सुदारप जालां, बालभवना कडले बालगणेशाचे घुमटे कडेन, सांतिनेज बऱ्याच वाठारांत, होम सायन्स म्हाविद्यालया कडेनच्या रस्त्यार बांदावळ जातना प्रदुशण वाडटा, धुल्ल खायत चलप जाता. बांदावळ जे तरेन जाता तें पळेल्यार पणजेंतल्या हेर वाठारांतल्या वावराक वर्सभर लागतलें अशे विचार पणजेकारांच्या मनात आयल्यार अजाप दिसचें न्हय.
आंतरराष्ट्रीय चित्रपट महोत्सवांत (इफ्फी) अंदूं कला अकादमीत सिनेमा पळोवंक मेळत व्हय? कला अकादमीचे बांदावळीक नेट आयला, रस्त्या वटेन दुरीग मातये कोरांत सजता, खूब तेंपाच्या एका झाडाक वाटावपाच्या वावरांत घुस्पल्ल्यांक परबीं फावतात. भायल्यान पळेल्यार तरी कला अकादमीचें कामकाज पूर्ण जावपाक आनीक स म्हयने तरी लागतले, अशें दिसता. मुखेलमंत्री डाॅ. प्रमोद सावंत कला आनी संस्कृतीमंत्री गोविंद गावडे हांचे सयत कला अकादमीच्या वावराची पळोवणी करून म्हायती घेवपाचो येत्न करीत व्हय?
नवनिर्मणेची बारीकसाण पणजेकारांनी येतना वतना घेवचीच आनी सरकाराक सुचोवण्योय करच्यो. ग्रेटर पणजी नियोजन आनी विकास प्राधिकरण रद्द करपाचो लेखी विधी सोंपला आसतलो. ते फाटभूंयेर पणजे फेरीबोटीच्या धक्या कडेन सुदारप जालां, गणपती विसर्जनाची आडमेळीं तातूंतल्यान पयस जालीं, हें बरें जालें. कांय आदल्यो 75 वर्सांच्यो बिल्डिंगो मातये भरवण जावपाचे वाटेर आसात, त्यो बेगीन मोडल्यार कशें? संस्कृती रक्षकांनी बोवाळ केल्ल्यान कॅप्टन आॅफ पोर्टसा कडेन न्हंयचे देगेर चलिल्ली बांदावळ बंद पडल्या, तें दिसतलेंच. त्या भायर ती व्हड्या वरी कित्याक हालता, धोलता ती म्हायती न्हंय येरादारी मंत्री घेत? थंय वेगळेंच सत उजवाडाक आयलां? नवनिर्मणेत मांडवी न्हंयेचेर घालता ते वंये कडेन न्हंय येरादारी मंत्र्यांनी पळोवचेंच. कोयर वेवस्थापन मंत्री आतानासियो मोन्सेरात हांचे वांगडा न्हंय येरादारी, शिंपणे मंत्र्यांनी मांडवी न्हंयेचे देगेर रोखड्या रोखडें भोंवडेक वच्चें. बांदकामा विशीं इंजिनियरां कडल्यान म्हायती घेतल्यार हुंवार येवचो न्हय म्हणून उपाय करपाक मेळटले. उमाशे कडेन न्हंयच्या उदकाचीं ल्हारां ऊंच उडनात, न्हंय मात्शी थंड न्हिदिल्ले वरी दिसता, पूण पुनवे कडेन ल्हारां उंचाबळ जातात, हु़डक्यो मारतात, नाचतात, तें मांडवी कडेन पळेत रावल्यार कळटा. हुंवाराचे वेवस्थापन करपाक उमास, पुनवे कडल्या आठ- धा दिसांच्या ल्हारांचो अभ्यास जावचो. तमनार कंपनीचे अधिकारी व्हडा प्रमाणात पणजे आयल्यात आनी दर्या, न्हंयचे देगे वयल्या वाठारांनी राबितो केला, हें सरकाराक खबर आसतलेंच. तमनारान मांडवीच्या ल्हारांतल्यान वीज निर्मणे खातीर संशोधन केल्यार कंपनी वेलें कोळशाचें खत पुसतलें. कोळशाची येरादारी मांडवीतल्यान फाटल्या वर्सा मेरेन जाताली, ती सेझा पीग आयर्न प्लान्टा खातीर. आतां प्लान्ट बंद दवरला अशो खबरो आसात. उद्येगा मदीं, कंपन्या मदीं देस पावंड्यार जावपी कबलातीच्यो खबरी वाचल्यार अंबानी, अदानी वेगळ्या हुमऱ्यार आसात. तंत्रगिन्यानांतल्यान तांच्यो कंपन्यो पणजीच न्हय गोंयांक, गोंयच्या उद्येगांक वेगळी वाट दाखयत?
मोपांतल्यान महासत्ते कडेन वतना, नवनिर्मणे कडेन वतना मांडवीक धपको बसचो ना, हाची जतनाय सरकारान घेवची. मांडवी म्हळ्ळ्यारच म्हादय आनी म्हादय म्हळ्ळ्यार गोंयकारांची आवय. ते आवयक सांबाळ्ळ्यार पणजी बुडचीना, नवनिर्मणीय शिस्तीन जातली. शिस्तीक आयचे जिणेंत म्हत्त्व आसा, तातूंतल्यान पणजेंतल्या पसरकार, हाॅटेलवाले, दिसाळीं विकतल्यांची भुरगीं जैतवंत जाल्यांत.
पणजेंतल्यान जैताचीं ल्हारां गोंयभर व्हांवतात, गोंयां भायल्यान आयिल्ले पणजे व्हड जातात, पणजेच राबितो करचो अशें तांकां दिसता, पूण गांव उलो मारता ताचें कितें? मांडवीचेर अटल सेतू बांदतना म्हापसा- पणजे लागीं हाडपाचो ध्येयवाद आदले मुख्यमंत्री मनोहर पर्रीकर हांणी दवरिल्लो. अटल सेतूच्यो सगल्यो वाटो पुरायपणान सारक्यो बांदून जाल्यात? आत्र्या पयऱ्यान येरादारीची कोयंडी, अपघात जाता ते कित्याक? पणजी नवनिर्मणे कडेन वतना सरकारच न्हय पणजेच्या आमदारांनी चड जापसालदारकी घेवचीच पडटली, लोकांक विश्वासांत घेवन फुडें वचप समा जातलें.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
