भांगरभूंय | प्रतिनिधी
इमेजिन पणजी
नवनिर्मणेतल्यान अर्थकारणाक दिका दितना पणजेंत शिस्त येता, पार्किंगय खंयचे खंय जाल्यार दुडवांची ख्यास्त जाता. सी सी टी व्ही कॅमेरे तिरंग्यांचेरय लक्ष दवरतले, प्लास्टिकचे बावटे घेतल्यांचेर, विकतल्यांचेर कारवाय जातलीच.
–
पणजे कांपालार नवे पेव्हर्स बसयतना मांडवी न्हंयंचे देगे वयले पासयेक ताकतीक आसा तिरंग्याक सलाम करपाची. थंयच आदिलशहा पॅलेस, म्हापालिका बिल्डिंगेचे नवनिर्मणेची वाटय दिसतली. शार आनी ग्राम नियोजन मंडळान थळाव्या आमदारांक, कोयर वेवस्थापन मंत्र्यांचे मान्यतायेन ग्रेटर पणजी परतून पणजेंत हाडपा खातीर निर्णय घेतला. ग्रेटर पणजी पणजेचे नवनिर्मणे खातीर जाल्ली, पणजेची नवनिर्मणी सुरू जाल्ल्यान गरजे भायर विस्तार थांबोवपा पासत घेतिल्ल्या निर्णयाचो लाव नागरिकांक जातलो. फाटींफुडें बांबोळे स्मार्ट सिटीचीं रायबंदर, बांबोळे हीं जुंवळीं भावंडांय सुदारतलीं, अशी आस्त आसा. रायबंदर, बांबोळे सोबीत करपाचें सपन आदले मुख्यमंत्री मनोहरबाब पर्रीकार पळयताले व्हय? ताचो आरंभ डाॅ. श्यामाप्रसाद मुखर्जी स्टेडियम, कुजिरा बांबोळे शिक्षण संकुलाचे बांदावळींतल्यान जाल्लो आसूंये.
भारत स्वातंत्र्याच्या अमृत महोत्सवी वर्सांत दोन-तीन दीस तिरंगो घरा-दारांचेर लावपाचो केंद्र सरकाराची विनवणी अभिमानाची. त्या सुचोवणेचो आदर करतना तिरंग्याचो अपमान जावचो ना, तिरंगो चुरिल्लो, लोळिल्लो आसचोना, पायापोंदा पडचोना, पावसांत भिजचोना ही जतनाय प्रत्येकाक घेवची पडटली.
तिरंग्या खातीर दोन खासा ध्वजस्तंभ पणजेंत आसात, पर्वरे विधानसभा संकुल आनी सचिवालयाचे मजगतींचे सुवातींतय झेंडावंदन जाता. तिरंगो हुबयलो म्हूण जावचें ना तो सांजवेळा देवोंवपय म्हत्त्वाचो, नेमावळींत बदल जाला आसात ते विशीं सरकारान सुचोवण्यो करच्यो. पणजे आदल्या सचिवालय, मंत्रालया कडलो ध्वजस्तंभ सदां सांजवेळा देंवयतना आपसूक गाडयो, मनशाचें चलपय थांबतालें. स्वातंत्र्यदिनाचे कार्यावळींतय तिरंग्याक मान फोटोग्राफर, व्हिडियोग्राफरांनी दिवपाक जाय. तांणीय तिरंग्याक सलामी दितना फोटे, व्हिडियो घेवपाची तजवीज आतां पणजेंत बसयल्ले सी सी टी व्ही कॅमेरे करत व्हय? पणजे सी सी टी व्ही यंत्रणा सगल्यांचेर नदर दवरता, यंत्रणेचे अधिकृतपणान उक्तावण करूंक नासलें तरी कॅमेरा चारय दिकांनी भोंवता, चुको केल्यार धरता. बिजलेचे नवे खांबेय शेंकड्यांनी आयल्यात, वीस वर्सां आदले खांबे बदलपाची तयारी दिसता.
नवनिर्मणेतल्यान अर्थकारणाक दिका दितना पणजेंत शिस्त येता, पार्किंगय खंयचे खंय जाल्यार दुडवांची ख्यास्त जाता. सी सी टी व्ही कॅमेरे तिरंग्यांचेरय लक्ष दवरतले, प्लास्टिकचे बावटे घेतल्यांचेर, विकतल्यांचेर कारवाय जातलीच.
पणजे म्हापालिकेच्या बिल्डिंगेतलें खादी ग्रामोद्योग भांडार (दुकान) नवनिर्मणेत वतना बंद आसा. काॅटन खादी परस आतां सिल्क खादी सगल्यांक भावता, तिरंगेय सिल्काचे जाल्यात, ते मेळटात म्हापालिका बिल्डिगेंतल्या लिननकिंग, द किंगमेकर ह्या दुकानांत ३० रुपयांक. सांबाळून वचात, लिननकिंग आशिल्लो म्हापालिकेच्या बिल्डिंगेचो वाठार मात्सो असुरक्षीत जाला.
मुख्यमंत्र्यांच्या सरकारी निवासाचो जागो आशिल्ल्या म्हालक्ष्मी बंगल्यांतय तिरंग्याक सलामी मेळटली. अटल सेतू कडेनय फ्लॅगपोस्ट आसा, राखणे मंत्रालयाची कार्यालयां, पुलीस ठाणे, पुलीस मुखेल कार्यालय, जिल्होधिकारी कचेरी अजूनय पणजेंत आसात. म्हापालिका इमारती सावन अटल सेतू लागसार आशिल्ले तिरंगे यादींत दवरतना कसिनो बंदची अधिसुचोवणी काडपाची याद आसतलीच.
तिरंग्याची ताकतीक सगल्यांकच आसा, पूण ते ताकतिकेंत घटने कडेन, तिरंग्या कडेन आशिल्ली जण एकल्याची लागणूक समजून घेवची. बदल जातनाय तिरंग्यांतले रंग क्रांती, शांतीचो संदेस दितात, मुळावण कशें विसरूं येत? पणजेचेंय तशेंच जालां, नवनिर्मणे कडेन वतना, नव्या साधनसुविधांची निर्मणी करतना मुळाक हात घालपाचे येत्न जाल्यार मांडवी खवदळ घालतली, तिचेर हुंवार, सांवार आयल्यार कोण आडायतलो? ती मांडवीच न्हय तर म्हादय तुमचें आमचें जीवीत आसा. दुसऱ्यान ओढून व्हरतल्यांक ती वगी रावचीना. तिच्या आशीकुशीक दोंगुल्ल्यो, रानांय आसात, सैम सांगातांतच ती सोबीत दिसता.
तिरंग्याचे ताकतिकेंत सुता पुनवेक मांडवीची पूजा जातली, भावाक भयण राखी बांदतली. सादूर रावया, मास्क घालपय बरो, दो गज दूरी दवरपय बरी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
