भांगरभूंय | प्रतिनिधी
धारबांदोडें, सांकोड्डें, गुळेली पंचायत वाठारांतल्या लोकांच्यो कागाळी
फोंडें: धारबांदोडें, सांकोड्डें आनी गुळेली पंचायत वाठारांत फाटल्या कांय दिसां सावन नळांतल्यान खदूळ उदका पुरवण जायत आशिल्ल्यान थळाव्यां मदीं खवदळ पडला. शिवडें- धारबांदोड्यां रगाडा न्हंयच्या दोनूय वटांनी राखणे वणत उबारपाचें काम सुरू आशिल्ल्यान न्हंयेंतलें उदक खदूळ जाल्यार मदलोवाडो- सांकोड्ड्यां पुलाचें काम सुरू आशिल्ल्यान सांकोड्डें पंचायत वाठारांत खदूळ उदका पुरवण जायत आशिल्ल्याचें स्पश्ट जालां. पूण उदका स्रोत खात्यान उदका पुरवण करपी बांदकाम खात्याच्या अभियंत्यांक म्हायती दिनासतनाच काम सुरू केल्ल्यान लोकांचे भलायके खातीर हें उदक घातक थारपाची शक्यताय उक्तायतात.
फाटल्या कांय दिसां सावन धारबांदोडें, सांकोड्डें आनी गुळेली पंचायत वाठारांत खदूळ उदकाची पुरवण नळांतल्यान जायत आशिल्ल्याच्यो कागाळी वाडत आसात. सद्या उदकाचो उणाव वेगळ्या वेगळ्या वाठारांनी जायत आशिल्ल्यान आनी गरमेचो पारो वाडिल्ल्यान खदूळ उदकाक लागून वाठारांतले लोक बेजारल्यात. गरमेचो पारो वाडिल्ल्यान ल्हान भुरगीं लेगीत खदूळ उदक पियेवपा खातीर वापरत आशिल्ल्यान तांचेर भलायकेचो परिणाम जावपाची शक्यताय उक्तायतात. लग्न वा हेर सुवाळ्यांनी लेगीत खदूळ उदकाचो वापर रांदपा खातीर करतात.
शिवडें- धारबांदोडें वाठारांत फाटल्या कांय दिसां सावन उदका स्रोत खात्यान न्हंयेच्या दोनूय वटांनी राखणे वणत उबारपाचें काम सुरू केलां. ते खातीर न्हंयचेर दोन मशिनां काम करीत आशिल्ल्यान पुराय उदक खदूळ जालां. तेच बराबर मदलोवाडो- सांकोड्ड्यां पुलाचें काम सुरू आशिल्ल्यान सांकोड्डें पंचायत वाठारांतल्या लोकांक खदूळ उदक पियेवचें पडटा. म्हत्वाची गजाल म्हणल्यार न्हंयचेर काम सुरू करचे पयलीं उदका स्रोत खात्यान कोणाकूच म्हायती दिवंक नाशिल्ल्यान लोकांच्यो कागाळी वाडल्यात.
कितल्याशाच नागरिकांनी खदूळ उदका विशीं धारबांदोडें, सांकोड्डें आनी गुळेली पंचायतीच्या सरपंचा कडेन कागाळी केल्यात. सोमारा सकाळीं बांदका खात्याच्या अभियंत्यांनी रगाडा न्हंयचेर वचून पळोवणी केली. उपरांत अभियंत्यांनी उदका स्रोत खात्याच्या अभियंत्यांक विनंती करून खदूळ उदक एके वटेन आडावन धरपाची विनंती केल्या. शिवडें वाठारांत न्हंयेतलें उदक शुद्ध दिसून येत आसलें तरी गुळेली वाठारांत फुडल्या कांय दिसांनी खदूळ उदका पुरवण जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
