नरकासुरा वेळा वयल्या संगीताच्या आवाजाची मानवाधिकार आयोगानूय घेतली दखल

भांगरभूंय | प्रतिनिधी

सांतिनेज वाठारांत संगीताच्या आवाजाचेर नदर दवरपाचे पुलिसांक आदेश

पणजी, प्रतिनिधी : नरकासुरा वेळार सगल्याच शारांनी रातभर व्हडले स्पीकर लावन मोठ्या आवाजांत संगीत लायतात. पणजे शारुय हाका आडवाद ना. ह्या संगीताचो जाण्ट्यांक, दुयेंतींक, ल्हान भुरग्यांक, मोनजातीक त्रास जाता. ह्या आवाजा विशीं सांतिनेजांतल्या एका नागरिकान मानवाधिकार आयोगा कडेन कागाळ केल्ली. आयोगान कागाळवजा याचिकेची दखल घेवन नरकासुरा वेळा वयल्या संगीताचो आवाज मर्यादे भितर आसचो, असो आदेश आयोजकांक दिला. तशेंच संगीताच्या आवाजाचेर नदर दवरपाचे आदेश पुलिसांक दिल्या.
बिरेस्तारा फांतोडेर नरकासुर प्रतिमा लासोवन गोंयकार भाव दिवाळी मनयतले. नरकासुर लासप हें गोंयचे दिवाळेचें खाशेलेपण. दिवाळेच्या आदले दीस रातभर सुरू आशिल्ल्या संगिताचो बऱ्याच लोकांक उपद्रव जाता. सांतिनेज वाठारात कामत आर्केड इमारती कुशीच्या नरकासुरा कडेन मोठ्यान संगीत सुरू आसता. हाचो जाण्ट्या मनशांक त्रास जाता, अशी कागाळ मानवाधीकार आयोगा कडेन एकल्यान केल्ली. आयोगान सुनावणी घेवपा सयत जाग्याची पळोवणी केली. नरकासूर आयोजकां वतीन श्रीयश च्यारी हांणी हस्तक्षेपाची याचिका दाखल केली. सध्याच्याच थळाचेर नरकासूर करपाक हरकत ना. मात, कामत आर्केड इमारती सावन तो जागो 20 मिटर पयस आसचो. संगिताचो आवाज नेमान दिल्ले मर्यादे भितर आसचो. पुलिसांनी आवाजाचे मेजमाप करचे आनी 12 नोव्हेंबर मेरेन आयोगाक अहवाल सादर करचो, असो आदेश आयोगान दिला. मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी हो आदेश दिला.