नथिंग इज परमनंट…

भांगरभूंय | प्रतिनिधी

सुपुल्ले गोंयचे भुंयेन साबार राजकी फोडाफोड पळयल्या. नव्या सरकाराची बांदावळ जाता, वेंचणुको लागीं येतात तेन्ना हेवटेन तेवटेन वचपी आमदार, माजी आमदार, मंत्री आशिल्ले आनी आयजय आसात.

तामीळनाडूंत 2026 चे विधानसभा वेंचणुकेंत व्हड जैत मेळोवपी ‘टीव्हीके’ न थळाव्या राजकी पक्षाच्या राजकारणाक नेट हाडला. वेंचणुकेंत ‘सिंगल लार्जस्ट पार्टी’ जाल्लो टीव्हीके बदलपी राजकारणात सगल्यांत व्हड प्रदेश पक्ष जाला.
तामीळनाडूचें हें राजकारण पळोवन, ‘पॉलिटिक्स इज नॉट स्टॅटिक, पॉलिटिक्स इज डायनेमिक ’, ‘नथिंग इज परमनंट’ ह्या उतरांची याद येता. राज्याचे आदले मुख्यमंत्री डॉ. विल्फ्रेड डिसोझा हांची हीं उतरां पक्षांतराचे बापूय (बादशहा) म्हणून डॉ. विली सगल्यांच्या यादींत आसात. तांचें राजकारण गोवा काँग्रेस, काँग्रेस, राश्ट्रवादी काँग्रेस, तृणमूल काँग्रेसी मेरेन भोंविल्लें. तांच्यो विदेसांतल्यो सरकारी भोंवड्यो राजकारणात तांकां म्हारग पडिल्ल्यो, मुख्यमंत्रीपद वगडावचें पडिल्लें. लोकसभेर वचपाची तांची इत्सा पुराय जालीना. लोकसभा वेंचणुकेनिमतान ते वेंचिक घरांनी भोंवपी. तेन्नाच्यो मध्यानरातीच्यो सभा आयज ना, राजकारण गोंयातसावन हेर राज्यांनी पावलां वेगळे वाटेन, तत्वां आनी सत्तेच्या हावेसान.
सुपुल्ले गोंयचे भुंयेन साबार राजकी फोडाफोड पळयल्या. नव्या सरकाराची बांदावळ जाता, वेंचणुको लागीं येतात तेन्ना हेवटेन तेवटेन वचपी आमदार, माजी आमदार, मंत्री आशिल्ले आनी आयजय आसात. मुळाव्या पक्षाक वेंर येता, पक्षांतले चडांत चड आमदार सरकाराक तेंको दितात तेन्ना त्या राजकारणाक तत्वांपरस सुवार्थाचो वास येता. त्या सुवार्थांत मनीसधर्मापरस धर्म, जात, पोटजात, अर्थकारण आसता.
शॉर्ट टर्म प्लॅनिंग करुन राजकारणात आयिल्ले मुख्यमंत्री सी जोजेफ विजय हांकांय चेकमेट करपी फुडारांत येतले. कोण आदर्श आसत तांचे? सिनेमातले आनी राजकारणातले मुख्यमंत्री. तांचें राजकारण पांच धा पंदराचें न्हय चाळीस पन्नासाचें. किरकोळ न्हय होलसेल. राजकारण नितळ करतलों, वेंचणुके तेंपार दिल्लीं उतरां पाळटलों अशें मुख्यमंत्री विजय म्हण्टात. त्याच श्वासांत ते हांव जादूगार न्हय, एका दिसान बदल शक्य ना अशेंय तांणी सांगलां. आदले मुख्यमंत्री मनोहर पर्रीकार हांचींय तींच उतरां आशिल्लीं ते पयले फावट, दुसरे खेप मुख्यमंत्री जाले तेन्ना.
मुख्यमंत्री विजय हांकां राजकारणात थिराय नासता, पिरायेक आजच्या खीणाक म्हत्व आसता ही जाणवीकाय आसा. ल्हान पूण आपल्या लागसल्ल्या मनशांक, तांच्या सोयऱ्यांक टीव्हीकेन अस्तंत बंगालावरी राजकारणांत हाडलां. तरणाटी वावराडी अस्तंत बंगालातल्यान राजकारणात आयल्या जाल्यार ड्रायव्हराचो पूत तामीळनाडूंत सत्तेंत पावला. दोगांकय राजकी पक्षांचें बळगें आशिल्लें, एक राश्ट्रीय, दुसरो राज्य पावंड्यावयलो.
गोंयच्याय राजकारणांत विधानसभा ते पंचायती मेरेन शेतकार, पदेर, वावराडी, सान्न मारपी, रांदपी (कॅटरर) आसात. शिक्षक, वेपारी, प्रोफेशनल्स, उद्येजक, मंत्री आनी मुख्यमंत्र्यांचे पूत, सून, धूव, घरकान्नच न्हय मंत्र्यांचें पी ए राजकारणांत पावल्यात. तामीळनाडूवरी गोंय शिकिल्लें, शिक्षण हक कायदो मार्गाक लायिल्लें राज्य.
राज्यांतल्या शिक्षणाचो पावंडो वाडटना वेंचणुकेआदीं आरजीपीक खांवटें पडल्यार अजाप न्हय. म. गो. त तें पडलें, गोवा फॉरवर्डांत तें पडिल्लें, फुडारांत पडचेंना अशी गॅरंटी कोण दितलो? आम आदमी पार्टीय राज्यांतल्यान देसांत ते दिकेन गेली, फुडाराचें कितें? नथिंग इज परमनंट इन पाॅलिटिक्स, राजकारण ते संस्था, संघटनेमेरेन.
अस्तंत बंगालांत नवें सरकार आयलां, माँ, माती मातयेंतल्यान भारतमाते मेरेन वचपी. सत्तेर येतना अस्तंत बंगालचे मुख्यमंत्री सुवेंदु अधिकारी हांची गाडी चलोवपी ड्रायव्हर – सारथ्याक जीव वगडावचो पडलो. सपूतविधी थांबलोना, सरकाराची पुराय बांदावळ करतना अस्तंत बंगालांत शांतीकाय हाडपी सांगाती सरकारांत आसचे. 4 राज्यांतले 65 वर्सांपरस उणे पिरायेचे मुख्यमंत्री हो व्हड बदल. निर्शेणी, हुस्को, झुजाची कुपां आसतना देसांतलें बदलपी राजकारण झुज आडायतलें तें एकवटान.
शिरगांवचे लयराईचे जात्रेक सरकारान देवळालागींचीं सोऱ्याची दुकानां, बार्रां बंद दवरिल्लीं. जात्रा शांतीकायेन जाली तें सरकार सादूर राविल्ल्यान. 2026 गोंय विधानसभा वेंचणुकेच्या अजेंडार देवळां, शाळा, कॉलेजी लागीं बार अँड रेस्टॉरंटस, सोरो विकपी दुकानां नासतलीं हो विशय आसचो. सरकार लायसन दिता, लायसन दितना कायदे, नेमावळ कितें आसा ताचो अभ्यास करचो, वगतार निर्णय घेतल्यार युवा गोंयकार वाटावतले अॅक्सिडेंटांतल्यान.
पर्यटनाची दिका बदलपाक गोंयच्यान आरंभ जाला, तेच दिकेन दक्षीण भारत वतलो अशी आस्त बाळगुया. घुंवळे वखदां आड झुज दिवपाची तामीळनाडूच्या मुख्यमंत्र्याची भास आदल्या गोंयच्या मुख्यमंत्र्यांची. तीच 2026 चे वेंचणुकेच्या अजेंडार आसची.

सुहासिनी प्रभुगांवकार
9881099260