भांगरभूंय | प्रतिनिधी
पणजी : नगरपालिका वेंचणुके खातीर प्रभाग फेररचणूक तशेंच आक्षरणाविशींचो घोळ तशेंच वाद जावचे न्हय म्हूण मंत्रिमंडळान मान्यताय दिल्ल्या नगरपालिका कायदो दुरूस्तीच्या अध्यादेशाची अधिसुचोवणी जारी जाल्या. प्रभाग फेररचणूक तशेंच आरक्षण निश्चीत जाले उपरांत वेंचणुकेची तारीख जाहीर करपाचे अधिकार राज्य वेंचणूक आयोगाक दिल्यात.
प्रभाग फेरचणुके खातीरच्या मसुद्याचेर हरकती, सूचोवण्यो आयले उपरांत ३० दिसांत वेंचणूक आयोगान प्रभागांची फेररचणूक निश्चीत करपाक जाय.
प्रभागांची फेररचणूक निश्चीत जाले उपरांत राज्य वेंचणूक आयोगान राज्य मागासवर्ग आयोगाकडल्यान मागासल्या जातींविशींची म्हायती तशेंच आकडेवारी मेळोवपाक जाय. ही म्हायती मेळयल्या उपरांत राज्य वेंचणूक आयोगान आरक्षणाचो मसुदो ३० दिसांत जाहीर करपाक जाय. ह्या मसुद्याचेर हरकती तशेंच सुचोवण्यो घेवपा खातीर ३० दिसांची मुजत दिवपाक जाय. आरक्षणाची निमणी अधिसूचोवणी जारी जाल्या उपरांत ३० दिसां उपरान नगरपालिका वेंचणुकेची तारीख जाहीर करची पडटली. नगरपालिका कायद्याच्या कलम १० मदी ही दुरूस्ती केल्या.
नगरपालिका कायद्याच्या कलम ११ मदीं लेगीत दुरूस्ती केल्या. नगरपालिका वेंचणूक जाहीर जावपाच्या ३० दिसा पयलीं नगरपालिका प्रभागातल्या मतदारांची वळेरी जनतेक पळोपा खातीर दवरपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
