भांगरभूंय | प्रतिनिधी
वाळपय, प्रतिनिधी: सरपंच संध्या खाडीलकार हांणी सरपंच पदाचो राजिनामो दिले उपरांत आयज जाल्ले वेंचणुकेंत उर्मिला लक्ष्मण गांवस हांची नगरगांवच्या सरपंचपदाचेर विरोधा विणें निवड जाली. ह्या वेळार वेंचणुकेक सगळे पंचायत वांगडी हाजीर आशिल्ले.
वेंचणूक अधिकारी म्हणून वाळपय गटविकास कार्यालयाचे विस्तार अधिकारी लक्ष्मण नायक हाजीर आशिल्ले. नगरगांवची सरपंच संध्या खाडीलकार हांणी तोंडी कबलाती प्रमाण सरपंच पदाचो राजिनामो दिल्लो. तो मंजूर जाले उपरांत नव्या सरपंचाची वेंचणूक पंचायत संचालकांनी निश्चीत केल्ली. मंगळारा सकाळीं सुमार ११ वरांचेर ती जाली. सरपंचपदा खातीर उर्मिला गांवस हिचो एकूच अर्ज सादर जाल्लो.
वेंचणूक अधिकारी लक्ष्मण नायक हांणी उर्मिला हांची सरपंचपदार निवड जाल्ल्याचें घोशीत केलें. ह्या वेळार संध्या खाडिलकार, उपसरपंच रामा खरवत आनी हेरांनी तांकां फुलांचे तुरे दिवन परबीं भेटयलीं.
ह्या वेळार रामा खरवत, संध्या खाडीलकर, देवयानी गांवकार, राजेंद्र अभ्यंकर, चंद्रकांत मानकार, मामू खरवत हे सगले पंचायत वांगडी हाजीर आशिल्ले.
प्रतिक्रिया उक्तायतना सरपंच उर्मिला गांवस हांणी सांगलें, पंचायत वाठारांतल्यो समस्या सोडोवप आनी चडांत चड सुविधा दिवपाचेर भर दितलीं. आमदार तशेंच भलायकी मंत्री विश्वजीत राणे हांच्या मार्गदर्शना खाला गांवगिर्या वाठारांची उदरगत चालीक लावपाचो यत्न करतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
