भांगरभूंय | प्रतिनिधी
नवी दिल्ली: धोको निर्माण करपी आनी दुयेंत सुण्यांक इंजेक्शन दिवन मारूं येता. लोकांचे जिणेची सुरक्षा सामकी म्हत्वाची. जो अधिकारी निर्देश पाळचे ना, ताचेर अपमानाचो खटलो चलयतले, अशें सर्वोच्च न्यायालयान मंगळारा सांगलें. न्यायालयान ह्या प्रकरणांत सगल्यो याचिका भायर मारल्यो.
न्यायालयान हेंय सांगलें, फकत राजस्थानांतल्या श्रीगंगानगर शारांत एका म्हयन्यांत सुणे चावपाच्यो १०८४ घडणुको मुखार आयल्यो. अहवाला प्रमाण, ल्हान भुरग्यांक गंभीर दुखापती जाल्यो. मुखामळार खोल जखमो जाल्यो. तामिळनाडूक वर्साच्या पयल्या चार म्हयन्यांनीच सुणे चावपाच्यो सुमार २ लाख घडणुको नोंद केल्यात.
नोव्हेंबर २०२५त सर्वोच्च न्यायालयान शाळा, हॉस्पिटल, बस स्टँड, रेल्वे स्टेशन अश्या भौशीक सुवतांवेल्यान रस्ताद सुण्यांक काडपाचे निर्देश जारी केल्ले. सुण्यांक आसरो घरांत दवरचे आनी तांकां परत सोडचे न्हय, अशें म्हणिल्लें. रस्त्यांचेर सुण्यांक खावपाक घालपाचेरूय बंदी घाल्ली. उपरांत, श्वान प्रेमी आनी स्वयंसेवी संस्थांनी हे निर्देश रद्द करपा खातीर अर्ज केल्लो.
न्यायमुर्ती विक्रम नाथ, न्यायमुर्ती संदीप मेहता आनी न्यायमुर्ती एन.व्ही. अंजारिया हांच्या खंडपीठान ह्या प्रकरणाची सुनावणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
