भांगरभूंय | प्रतिनिधी
सरकारान तो काडून उडोवचो; संजय बर्डेची मागणी
म्हापशें: धुळेर म्हापश्यां सरकारी मुळावे शाळेच्या प्राकारांत एके खाजगी कंपनीन मोबायल टॉवर उबारला. ह्या टॉवराच्या रेडिएशनाक लागून ल्हान भुरग्यांचे भलायकेचेर विपरीत परिणाम जावंक शकता. हाचे दुश्परिणाम लक्षांत घेवन आनी विद्यार्थ्यांचे सुरक्षीतताये खातीर सरकारान हो टॉवर घडणूक थळा वयल्यान काडून उडोवचो अशी मागणी समाजसेवक संजय बर्डे हांणी केल्या.
काल (बुधवारा) शाळेच्या प्राकारांत बर्डे पत्रकारां कडेन उलयताले. ह्या वेळार सितेश मोरे आनी सुरज कांबळी हाजीर आशिल्ले.
2012 वर्सा जयपूर उच्च न्यायालयान निवाडो दितना टेलिकॉम सेवा दिवप्यांनी शाळा, हॉस्पिटल तशेंच खेळां मैदान वाठारांत मोबायल टॉवर उबारचो न्हय असो निवाडो दिल्लो. तरी लेगीत टॉवर घालून ल्हान भुरग्यांच्या जिवाचेर सरकार खेळत आसा ही दुर्दैवी गजाल. एके वटेन सरकार भुरग्यांक माध्यम आहार दिता आनी दुसरे वटेन मोबायल टॉवर उबारपाची परवानगी दिवन तांच्या आयुश्या कडेन खेळटा असो आरोप बर्डेन केलो.
शाळा वाठारांत ह्या टॉवराक परवानगी कशी दिली असो प्रस्न उपस्थीत करून मोबायल टॉवर कंपनी कडल्यान व्हड प्रमाणांत भाडें मेळटा. हो पयसो पळोवन सरकार संबंदीत खाजगी कंपनींक खंयचेय सुवातेर मोबायल टॉवर उबारपाची परवानगी दिता आनी लोकांचो जीव घाताक घालता अशी टिका तांणी केली.
हे शाळेंत गरीब लोकांची भुरगीं शिकतात. ताका लागून सरकारान ह्या ल्हान जिवा कडेन खेळचें न्हय. ह्या टॉवराक आमचो खर विरोध आसून सरकारात तो ताकतिकेन काडून उडोवचो. तशेंच खोर्ले विशेश भुरग्यांच्या शाळेच्या वाठारांत अशेच तरेन उबारिल्लो मोबायल टॉवर काडून उडोवचो अशीय मागणी बर्डेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
