भांगरभूंय | प्रतिनिधी
उपजिल्होधिकार्यान केली पळोवणी; रानां खातें सुस्त
फोंडें: धारबांदोडें पंचायत वाठारांतल्या प्रतापनगर आनी धुल्लय ह्या दोन सुवातांनी मंगळारा सकाळीं उपजिल्होधिकारी निलेश धायगोडकार हांणी घोळट्या पंगडा सयत पळोवणी केली. दोनूय कडेन दोंगर कापिल्ल्याचें स्पश्ट जालां. धुल्लयंत सर्वे क्रमांक 157/1 हे सुवातेंत सुरू आशिल्लें काम बंद उडयलें. वाठारांत खूबशीं झाडां मारून उडयिल्ल्याचें दिसून आयलें. रान खात्याचे अधिकारी मात सुस्त आशिल्ल्याचें दिसून आयलें. झाडां मारिल्लीं आसलीं तरी अजून मेरेन रानां खात्यान कसलीच कारवाय केल्ली दिसून येना. दोंगर कापणी प्रकरणांत गुथिल्ले सगले व्यक्ती तशेंच सुवातेच्या धनयाचेर खर कारवाय जावपाचे संकेत मेळूंक लागल्यात.
धुल्लयंत सर्वे क्रमांक 157/1 हे सुवातेंत व्हड प्रमाणांत झडां मारून प्लॉट तयार केल्यात. कांय प्लॉटांची विक्री केल्ल्याचें अधिकार्यांचे पळोवणेेंत दिसून आयलें. एका प्लॉटार सुरू आशिल्लें बांदकाम अधिकार्यांनी बंद करपाचो आदेश दिलो. मशिनाच्या सहाय्यान सुवात सपाट करतना वाठारांत खूबशीं झाडां मुळां सयत जमनीर कोसळिल्ल्याचें दिसून आयलें. घोळट्या पंगडान पंचनामो केला. पंगडांत दक्षीण गोंय जिल्होधिकारी कचेरेचे अधिकारी जिवा वेळीप आनी वृंदा फळदेसाय हाजीर आशिल्लीं. तशेंच धारबांदोडें पंचायतीचे तलाठी विश्वनाथ गांवकार हांणी लेगीत पळोवणेंत वांटो घेतलो.
प्रतापनगर वाठारांत दोंगर कापणीचे सुवातेर पळोवणी केली. दोंगर कापणीच्या सुवातेंत पार्क केल्ले दोन रिते ट्रक दिसून आयले. घोळट्या पंगडान वाठाराची पळोवणी करून पंचनामो केलो. गोपां कडल्यान मेळिल्ले म्हायती प्रमाण फाटल्या 10-12 वर्सां सावन दोंगर कापणी करून घरां बांदल्यांत. अदमाशेक 17 घरां वाठारांत उबरिल्लीं आसून वीज तशेंच रस्ते लेगीत तयार केल्यात. ते खातीर पंचायती कडल्यान कसलेच परवाने घेवंक नाशिल्ल्याचें चवकशेंतल्यान उक्तडार आयलां.
धारबांदोडें पंचायतीचे सरपंच बालाजी उर्फ विनायक गांवस हांणी धुल्लय हांगा जमीन सपाट करपा खातीर पंचायती कडल्यान कसलेच परवाने घेतले नात. बेकायदो प्लॉट करपाचें काम पंचायतीन बंद केल्लें. तशेंच प्रतापनगरांत लेगीत घरां बांदिल्ल्या लोकांनी उदक आनी वीज जोडणी घेवपा खातीर परवाने घेतिल्ले नात. पूण सेल डिडाची कागदपत्रां दाखल करून पंचायती वतीन कांय घर धनयांक ईएचएन क्रमांक दिल्ल्याचें सांगलें.
धारबांदोडें वाठारांत व्हड प्रमाणांत जमीन विक्रीचो वेवसाय सुरू जाला. वाठारांतले खूबशे तरणाटे एजंट म्हूण काम करतात. शारांतले खूबशे लोक ह्या वाठारांत सुवात खरेदी करपाची इत्सा उक्तायतात. पूण फाटल्या कांय वर्सांत पंचायत वाठारांत कितल्याशाच प्लॉटां मदले एक-एक प्लॉट तीग जाणांनी विक्री केल्ल्याचें उक्तडार आयलां. ताका लागून बनावट कागदपत्रां तयार करून जमनीची विक्री जायत आशिल्ल्याचें स्पश्ट जाता. प्लॉट खरेदी करपी लोकांनी सादुरताय बाळगुपाची मागणी थळावे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
