धावेचो निकाल 

भांगरभूंय | प्रतिनिधी

निकालाचो दीस लागीं पावता तशें काळजांत कल कल जावपाक लागता. ह्या निकालाक सगळ्या विद्यार्थ्यांच्यो मनोकामना पूर्ण जांव, ही देवा लागीं म्हजी मागणी.

काल अकस्मात ब्रेकिंग न्यूज वाचली. 20 मेक सांजचो साडेचारंक धावेचो निकाल. ही खबर वाचून खूप जाणांचो जीव आकुळ पिकूळ जालाच आसतलो. दुबाव ना. धावेचो निकाल म्हळ्यार जिवीतांतलो पयलो व्हडलो निकाल. गोवा बोर्डाचो हो निकाल. जिवीताची एक नवी सुरवात, एक नवी आस्त.  उमेद आनी भंय दोगांयचो संगम ह्या निकालाक म्हणपाचो. हें फकत विद्यार्थ्यां बाबतीनूच घडना. तर घरची सगळी मंडळी तशेंच शिक्षकांच्या कपलार आटयो येता तोच हो दीस. 

कितें घडटलें कांय हो हुस्को. देवाक घाल्ल्या गारांण्याक, कांय जाण घेता राखणेचो प्रसाद, कांय मागणी, सांगणी आनी जायते पावतोसा जावपाचो हो दीस. कलकलतें काळीज, सुटपी घाम, हुस्को, चिंता, व्यथा हया सगळ्याचो हो दीस. देवा पाव, देवा पाव, म्हजो बाब, म्हजें बाय, कोणालो भाची, कोणालो भाचो, पुतणयो पास जाल्यार पुरो रे देवा. म्हजे विद्यार्थी बऱ्या मार्कांनी पास जाल्यार पुरो रे देवा… वेगवेगळ्या तरेन देवाक होरावणी. आमी कितलोय बरो पेपर बरोंव देवाचो सांगात जायच.

पेड्यांक अच्छे दिन येवपाचो हो दीस. बरे मार्क पडलेच म्हूण जायना शाळेंत पयलो येवंक जाय तो हुस्को. म्हज्या इश्टा परस म्हजीच शेंकडेवारी चड जावंक जाय हो हुस्को. ह्या सर्तीच्या विश्वांत कोण पावतलो मुखार कोण पडटलो फाटीं. हजार पुता माथ्याक राठी. कोणाक पडटले 97%  कोणाक मेळटले शाळेंत पयलो येवपाचो मान. शिक्षकांक तर आपल्या विशयांत पासिंग 100% मेळटले कांय ना तो हुस्को. 

कांय निकालाचेर अवलंबून आशिल्ले विज्ञान, वाणिज्य, कला शाखेची निवड कितें घेव कितें नाका सगळोच गोंधळ आनी कोफुसांव. कांय जाणांचे टार्गेट 98% मेळपाकूच जाय. ती चिंता. आज कालच्या काळांत फकत पास जावन उपेग ना, अशें जाय, तशे करूंक जाय म्हूण उपदेशाचे डोस दिवपी पालक कोणाकूच निकाल जायसर सुसेग ना. कांय जाणांनी देवा लागीं दुकां येवन गळयल्याय आसतलीं. देवा सगळे बरें जांव दीं तुका एक किल पेडे दिता म्हूण देवाक आमिशांय दाखयल्यां आसतलीं. 

असो हो निकालाचो दीस लागीं पावता तशें काळजांत कल कल जावपाक लागता. ह्या निकालाक सगळ्या विद्यार्थ्यांच्यो मनोकामना पूर्ण जांव, ही देवा लागीं म्हजी मागणी. ऑल द बेस्ट मोगाळ भुरग्यांनो. 

शिल्पा लाड 

8411007204