भांगरभूंय | प्रतिनिधी
वाळपय, प्रतिनिधी: सत्तरी म्हालांत व्हडा प्रमाणांत बेकायदेशीर चिरेखाणी आसात. ह्यो चिरेखाणी बंद करच्यो अशी मागणी खुबशे फावटीं केल्या. मात पुलीस, संबंदीत मामलेदार हे सेगीत आडनदर करीत आसतात. ताका लागून खाण संचालनालया वतीन अचकीत धाडी घालून ह्या चिरेखणींचेर कारवाय करपाचें सत्र फाटल्या कितल्याशाच वर्सां पसून सुरू आसा. खाण आनी भूगर्भ खात्याच्या अधिकार्यांनी नगरगांव पंचायत वाठारांतल्या धावे हांगा धाड घालून सुमार १० लाखांची मालमत्ता जप्त केली. ह्या प्रकरणांत दोगांचेर गुन्यांव दाखल केला. हातूंत रामा खरवत (धावे तार सत्तरी) आनी निलेश राणे (सोनाळ सत्तरी) हांचो आसपाव आसा. जप्त केल्ली मशिनां सध्या वाळपय पुलिसांच्या ताब्यांत दिल्यांत.
हे विशीं दिल्ले चड म्हायती प्रमाण, काल सकाळीं सुमार १० वरांचेर खाण आनी भुगर्भ खात्याचे अधिकारी जितेंद्र वेळूसकार हांच्या मार्गदर्शनाखाला धावें हांगा सुरू आशिल्ले चिरे खाणीचेर धाड घातली. ह्या वेळार चिरे उत्खनन करपाचें काम सुरू आशिल्लें. तेन्ना खुबश्या कामगारांक आनी मशिनरीक ताब्यांत घेतले. चवकशे वेळार
कामगारांनी ही चिरेखण रामा खरवत हांची आशिल्ल्याचें सांगलें.
तशेंच येवपी काळांत सत्तरी म्हालांतल्या गुळेली, भिरोंडा, पिसुर्ले पंचायत वाठारांत सुरू आशिल्ल्या बेकायदेशीर खाणींचेर धाड घालून कारवाय करतले, अशें ह्या वेळार भूगर्भ खात्याच्या अधिकार्यांनी स्पश्ट केलां.
ह्या वेळार चिरेखाणीचेर आशिल्लीं चिरे उन्खननाची मशिनरी, पावर ट्रिलर, जनरेटर आनी चिर्यांची येरादारी करपी GA05T5511 ट्रक ताब्यांत घेतला. ह्या सगळ्या सामानाची रक्कम सुमार धा लाख रुपया जावन आसा. तशेंच ह्या वेळार ताब्यांत घेतिल्ले सगळे कामगार झारखंड राज्याचे आशिल्ल्यान तांकां आनी जप्त केल्ली मशिनरी वाळपय पुलिसांच्या ताब्यांत दिल्या.
ही चिरेखण रामा खरवत हांची. तांचे आड वाळपय पुलीस स्टेशनाचेर कागाळ दाखल केल्या. बेकायदेशीरपणान चिर्यांचें उत्खनन आनी येरादारी केल्ल्याचे गुन्यांव ताचेर दाखल केल्यात. तशेंच तांच्या शेजारचे निलेश राणे हांचेरूय अशे तरेचो गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
