भांगरभूंय | प्रतिनिधी
फोंडें, प्रतिनिधी: धारबांदोड्यां उपजिल्होधिकारी कार्यालय सामकार धोको निर्माण करपी स्पिडब्रेकरा लागसारा रस्त्यावयलो दिवो, गरजेच्यो सुचवण्यो दिवपी तखटो आनी रंग मारपाचें काम बुधवार मेरेन जातलें, अशें आस्वासन मंगळारा सकाळीं अधिकार्यांनी दिल्ल्यान थळाव्यांनी रस्तो आडावपाचो निर्णय रद्द केलो. बुधवार मेरेन जर मागण्यो पुराय जावंक ना जाल्यार बिरेस्तारा रस्तो आडावपाची शिटकावणी ग्रामस्थांनी आयज दिल्ली.
सोमारा रातच्या वेळार स्पिडब्रेकरा लागसारा स्कुटर कोसळून निफा फर्नांडीस हे तरणाटे चलयेक मरण आयिल्लें. हाचे पयलींच जायते फावटीं ह्या स्पिडब्रेकरा कडेन अपघात जाल्ल्यान थळावे हाचेर कितेंय उपाय करपाची मागणी करताले. मात संबंदी अधिकार्यांनी लोकांचे मागणे कडेन आडनदर केल्ल्यान सोमार एके तरणाटेचो जीव गेलो. ताका लागून तिडकल्ल्या लोकांनी सरपंच बालाजी गांवस हांच्या नेतृत्वा खाला मंगळारा रस्तो रोको करपाचो यत्न केलो. मात उपजिल्होधिकारी निलेश धायगोडकार, सहाय्यक बांदकाम अभियंता आनंद वाघूर्मेकार, सहाय्यक वीज अभियंते निळकंठ सावंत, मामलेदार लक्ष्मीकांत कुर्टीकार, पुलीस उपअधीक्षक अर्शी आदिल, निरीक्षक तुषार लोटलीकार आनी हेर अधिकार्यांनी सरपंच बालाजी गांवस, पंच महेश नायक आनी हेर ग्रामस्थां कडेन चर्चा करून तोडगो काडिल्ल्यान रस्तो रोकोचो निर्णय रद्द केलो.
बांधकाम खात्याचे सहाय्यक अभियंते आनंद वाघुर्मेकार हांणी म्हायती दितना, स्पिडब्रेकर परत रंगोवपाचें काम मंगळारा रातचें उसरां मेरेन करतले. धोको निर्माण करपी स्पिडब्रेकरा लागसारा रस्त्या वयले दिवे घालपाच्या कामाक सुरवात केल्या. वाहन चालकांक स्पिडब्रेकराची म्हायती दिवपा खातीर गरजेच्या तकट्या सयत हेर गजाली लक्षांत घेवन काम रतले अशें सांगलें.
सरपंच बालाजी गांवस हांणी बुधवारा मेरेन दिल्लें आस्वासन जर पुराय करूंक ना जाल्यार बिरेस्तारा लोक रस्त्याचेर देंवतले. फाटल्या कितल्याशाच म्हयन्यां सावन स्पिडब्रेकराक लागून जायते अपघात घडल्यात. ताका लागून फुडाराक आनी कोणाचो जीव वयचो न्हय देखून थळावे लोक एकठांय येवन अधिकार्यां कडेन चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
