भांगरभूंय | प्रतिनिधी
फोंडें: धारबांदोडेंच्या दुदसागर आनी रगाडा न्हंयांचेर बांदिल्ल्या बांदांचेर उदक सांठोवन दवरपा खातीर प्लेटी घालपाचें काम सुरु केलां. त्या वेळार लोकांनी न्हंयें लागसारा गोरवांक सोडचें न्हय. तशेंच नुस्तें मारपा खातीर जिलेटिनाचो वापर करचो न्हय, असो उलो उदकास्रोत खात्या वतीन मारला.
कुळें ते ओपा-खांडेपारा जलशुद्धीकरण प्रकल्प मेरेन वट्ट १३ बांद बांदल्यात. ‘उदक आडयात, उदक जिरयात’ हे येवजणे खाला उबारिल्ल्या ह्या बांदांचेर प्लेटी घालप सुरू केलां. ओपा प्रकल्पांत उदकाची पुरवण करपा खातीर बांद उदकाची पातळी राखून दवरपाक मजत करीत आसतात. बांदांचेर पर्यटक व्हडा प्रमाणांत न्हांवपा खातीर येत आसतात. ताका लागून कोयराची समस्या लोकांक सतायत आसता. पर्यटक मस्तीय केल्ल्यान थळाव्या लोकां वांगडा वाद जातात. ताका लागून उदकास्रोत खात्यान कुळें आनी फोंडें पुलिसांक पत्र धाडून गस्त घालपाची मागणी केल्या.
उदकास्रोत खात्याचे थळावे सहायक अभियंते सदानंद नायक हांणी चड म्हायती दितना सांगलें, लोकांनी सहकार्य करपाची गरज आसा. लोकांनी न्हंये लागसारां गोरवांक सोडचें न्हय. तशेंच उदक भरले उपरांत कोणेंच जिलेटिन घालून नुस्तेमारी करची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
