भांगरभूंय | प्रतिनिधी
मुख्यमंत्रीः आमदार प्रवीण आर्लेकार हांची येसस्वी शिश्टाय
भांगरभूंय । प्रतिनिधी
पेडणें: दोन खांब धारगळे एका वर्सा भितर उड्डाण पूल बांदतले, अशें आस्वासन मुख्यमंत्री डॉ. प्रमोद सावंत हांणी दिलें. ह्या वेळार पेडणेंचे आमदार प्रवीण आर्लेकार हाजीर आशिल्ले.
दोन खांब धारगळे राष्ट्रीय म्हामार्गाचेर उड्डाण पूल बांदचे, अशी कितल्याशाच दिसांची थळाव्या लोकांची मागणी आसा. तशा आशयाचें निवेदन तांणी राष्ट्रीय म्हामार्ग अधिकारी तशेंच संबंदीत खात्याच्या अधिकाऱ्यांक दिलां. आमदार आर्लेकार हांचीय भेट घेवन तांकां निवेदन भेटयलें आनी उड्डाण पूल बांदल्यार अपघात आळाबंदा येतले, अशें सांगिल्लें. ग्रामसभेंत हे संबंदांत थाराव मंजूर करून ते खातीर एक खाशेली समिती वेंचिल्ली. हे समितीन उड्डाण पुला खातीर सरकार दरबारांत यत्न केल्ले, तेचवरी आमदार आर्लेकार हांची भेट घेवन मागणी केल्ली. अखेर आमदार आर्लेकार हांणी मुख्यमंत्र्यांक ते सुवातेचेर आपोवन थळाव्या लोकां सयत तांचे कडेन चर्चा केली.
ह्या वेळार राष्ट्रीय म्हामार्ग बांदकाम रस्तो बांदकाम विभागाचे अधिकारी पार्सेकार, सरपंच अनिकेत साळगांवकार, पंच भूशण नायक, सतीश धुमाळ, उड्डाण पूल समितीचे पदाधिकारी अश्वेक नायक, भारत बागकार आनी हेर मानेस्त हाजीर आशिल्ले.
ह्या वाठारांत उड्डाण पूल नाशिल्ल्यान कितल्याशाच जाणांचे जीव गेल्यात. तो बांदलो ना जाल्यार दर दिसा अपघात जावन अपघातांची सांखळूच जातली, अशें थळाव्या लोकांनी मुख्यमंत्र्यांक सांगलें. ताचेर जाप दितना मुख्यमंत्र्यान सांगलें, ह्या वाठारांत उड्डाण पूल नाका म्हूण धारगळकारांनीच सयांचें पत्र दिल्लें. आतां उड्डाण पूल जाय, अशी कशी मागणी करतात, असो तांणी प्रस्न केलो. ताचेर थळाव्या लोकांनी सांगलें, त्यो सयो बनावट आशिल्ल्यो. हें आयकून मुख्यमंत्र्यांकूय अजाप जालें.
ह्या वेळार मुख्यमंत्री डॉ. सावंत हांणी रस्तो विभाग अधिकारी पार्सेकार हांकां ह्या प्रकरणांत कसल्यो उपाय येवजण करप शक्य आसा, तें पळोवपाची सुचोवणी केली. तशेंच पर्वरी आनी दोन खांब धारगळेच्या उड्डाण पुला खातीरचे प्रस्ताव केंद्र सरकाराच्या रस्ते विभागाक धाडले उपरांत ताची कार्यवाही करची, अशी सुचोवणी केली.
सादारण वर्सा भितर धारगळेचो उड्डाण पूल उबारपाचें आस्वासन दिल्ले खातीर थळाव्या लोकांनी मुख्यमंत्र्यांचे उपकार मानले. तशेंच आमदार आर्लेकार हांणी ह्या प्रकरणांत विशेश लक्ष घालून मुख्यमंत्र्यांची भेट घडोवन हाडिल्ले खातीर तांचेय उपकार मानले.
दोनूय आमदारांक जाय उड्डाण पूल…
पेडणें मतदारसंघाचे आमदार प्रवीण आर्लेकार आनी मांद्रे मतदारसंघाचे आमदार जीत आरोलकार ह्या दोगांचेंय उड्डाण पुला खातीर समर्थन आसा. ते दोगूय आमच्या वांगडा आसात, अशें थळाव्या लोकांनी आनी समितीन मुख्यमंत्री डॉ. प्रमोद सावंत हांकां सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
