भांगरभूंय | प्रतिनिधी
म्हापशें, प्रतिनिधी ः शिरगाळ -धारगळ एका घरांत लखनौ सुपर जायंट आनी सनरायजर्स हैदराबाद हांचे मॅची वेळार चलपी आयपीएल बेटिंग गुन्यांव फांट्यान उक्ताडार हाडलें. ह्या प्रकरणात गुजरातांतल्या दोग जाणांक अटक करून तांचे कडल्यान देड लाखांचे सामान जप्त केलें. उपरांत सकाळीं तांका जामीनाचेर सोडले.
आयपीएलाचेर बेटिंग चलता ही खबर गोंय पुलीस गुन्यांव फांट्याचे निरिक्षक राहुल परब हांकां मेळ्ळी. हे म्हायती प्रमाण ताणें पुलीस उपनिरिक्षक गिरीश पाडलोस्कार आनी कर्मचाऱ्यां सयत काल रातीं 9.10 ते 11.00 वरां मजगतीं शिरगांळातल्या ‘दुर्वा’ नांवाच्या बंगल्याच्या पयल्या माळ्यार धाड घाली. ह्या वेळार दुबावीत प्रतीक रा. विनुभाई कोरात (29, सुरत) आनी मिहिरभाई नटुभाई परमार (29, भावनगर) हे दोग जाण मुळ गुजरातांतले तरणाटे बेटिंग करतना मेळ्ळे.
लखनौ सुपर जायंट आनी सनरायजर्स हैदराबाद हांचे मदीं काल सांजवेळा 7.30 वरांचेर मॅच चालू आशिल्ली. दोगूय दुबावित ह्याच क्रिकेट मॅचीचेर बेटिंग करतना पंगडाक मेळ्ळें. पुलिसांनी रोखडेच दोगांकय अटक करून लॅपटॉप, मोबायल फोन आनी हेर बेटिंगाचे सामान मेळून सुमार देड लाख रुपया मोलाचे सामान जप्त केले. ते उपरांत आयज सकाळीं तांची जामीनाचेर सुटका जाल्या. ह्या दोगांयच्या चवकशेंत हातूंत आनीक एक मनीस आसा हें उजवाडाक आयलां. पुलिस ताचो सोद घेतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
