धांवतना थिराय, उदरगत विसरप ना

भांगरभूंय | प्रतिनिधी

जैत कोणाचें तें निमाणें मतदार थारयतात. वेंचणुकेंत मतदार व्हड.

विधानसभेची वेंचणूक लागीं येतना राज्यांतलेंच न्हय देश विदेशांतलें राजकारण वेगीं धांवपाक लागलां. पक्षनिश्ठ “डिसिप्लिन्ड सोल्जर” गिरीशबाब चोडणकार परतून एकदां काँग्रेस प्रदेशाध्यक्ष जाल्यात. मडगांवचे आदले नगरसेवक, युवा काँग्रेस अध्यक्ष, प्रदेश सरचिटणीस, प्रदेशाध्यक्ष, अखील भारतीय काँग्रेस जोड सचीव, गोंय हाॅर्टिकल्चर काॅर्पोरेशन अध्यक्षपदाची जापसालदारकी तांणी सांबाळ्ळ्या. वेंचणुके तेंपार फाटलीं कांय वर्सां गिरीश राज्यांत पक्षाचें वजें घेता. एका तेंपार आशिल्लें अध्यक्षपदाचें म्होंवा बोट प्रदेश काँग्रेस अध्यक्षांक आतां कांट्याचो मुकूट दिसतलें.
वेंचणुके वेळार, उपरांत प्रदेशाध्यक्षाच्या आंगार कोयर उडोवपी, हेवटेन तेवटेन वचपी आसतात. बेशिस्तीक भिवपाची गरज ना हें गिरीशाक अणभवान कळ्ळां. भिरांत जैता उपरांत जावपी पक्षांतरांची, दादा आनी दीदींच्या. पक्षांतरां मोडून काडपाक सांगाती अॅड. सुनील कवठणकार, आमदार अॅड. कार्लोस फेरेरा, नवे ट्रेजरर उद्देगपती दत्ता दामोदर नायक आसात. प्रदेश काँग्रेस जाग्यार घालपाक गिरीशाक धांवपाची, चलपाची गरज आसा. खीणभर विसव घेतना रात दीस कळचे ना, पावसांत भिजपय जातलेंच.
21 – 30 चें राजकारण धांवतना इतिहासाचेर मात्शी नदर मारपाची गरज आसा. पक्षांतरांतल्यान बेशिस्त येता, थिराय, उदरगत पयसावता हें सांगपाक गिरीशान अनमनचें न्हय. गिरीश आनी भाजपाचे प्रदेशाध्यक्ष दामोदर नायक हांची तुळा जातली. दोगांचीय पक्षनिश्ठा मतदारांक नवी न्हय, जैताचे पांवडे म्हत्वाचे. पक्षाक जैत मेळोवन दितल्यांक जैताची घुडी उबारतना खरस मारता तेन्ना भलायकी, मार्ग म्हत्वाचे जातात.
पक्षनिश्ठा मोडटल्यांक, बेशिस्तांक पयस दवरप आडनदर करप वेंचणुकेंत लाव मेळोवन दिता. जैत कोणाचें तें निमाणें मतदार थारयतात. वेंचणुकेंत मतदार व्हड. वाडे, मतदारसंघ ते बदलतात तेन्ना तांकां सोदप कठीण जातलें. घरा घरांनी गेल्यार सत कळटलें.
गोंयांत सगल्यांच्यो नदरो फातोड्डें, मडगांव, काणकोण, म्हापशें, पेडणें, पणजी, सांता क्रुझ, कुंकळ्ळी, सांखळी, दिवचल, ताळगांव, मडकय, फोंडें मतदारसंघांचेर भोंवपाक लागल्यात. मांद्र्यांतले सर थाकाय आयली तरी चलतले. जैतिवंतां कडेन उलयतना तांची शेजान्न पयलींच्यो मंत्री संगीता परब वांगडा अर्जूना सयत येतली, अपक्ष जावन.
दीस बरे येतले अपक्षांक, दोन उत्तरेचे, दोन दक्षीणेचे. एकल्याक मंत्रीपद मेळपाकच जाय मागणी करची आमदारांनी, मतदारांनी भाजपा, काँग्रेसीच्या. उमेदवारी पासत सर्त वाडटना राज्य भाजपा, काँग्रेस अध्यक्षांक तेंको दिवपाक प्रदेशीक पक्ष, अपक्ष उमेदवारांची मजत मेळटली. कोणाचो तेंको पयलीं, मागीर घेवपाची येवजण करतना दोन व्हड्यांचेर पांय दवरत, तोखणाय करपी आसतले. तांची मोख कितें? दोन राष्ट्रीय पक्षांचे प्रदेशाध्यक्ष मठग्रामातले, कोंकणी तांची राजभास. मतदारांनी जाणविकाय दवरची फाटल्या पांच वर्सांतल्या उदरगतीची, बदलपी प्रशासन, येवजण्यांची. कोवीड 19 तेंपा वयलीं मजत, भिवपाची गरज ना हीं उतरां मतदारांच्या मनां काळजांत आसात. विखुरिल्ल्या समाजमनाक एकठांय हाडपा पासत तीं उतरां मोलादीक.
मुख्यमंत्री डाॅ. प्रमोद सावंत हांकां तांचे मार्गदर्शी आदले संरक्षण मंत्री मनोहर पर्रीकार हांचो “मिशन सालसेत” उलो यादींत उरचो. म्हजें घर, म्हजो फ्लॅट, म्हजीं हेरिटेज घरां, म्हजो गांव, म्हजें शार, म्हजी पंचायत, म्हजी नगरपालिका गोंयकारांकूच दवरपाचो निश्चेव जावचो. म्हजी बस, म्हजी गाडी, म्हजी टॅक्सी, म्हजी मोटारसायकल पावसांत कुशीक दवरुया. येरादारींचे प्रदुशण, कोंयडी फोडपी व्हडली गाडी पार्क करपाक म्हापश्यां, मडगांवां पार्कींग प्लाझा, शाळा, म्हाविद्यालयां एकठांय हाडपी बांबोळेवरी प्रकल्पांची गॅरेंटी दिवपी उतरपत्र दिवचें. गोंयकार कोण? मुळां गोंयांत आसूनय गल्फांत, अमेरिकेंत, गोंयां भायर 40 – 50 वर्सां रावपी? कोंकणीचो परमळ संवसारांत पातळावपी ? जल्मान गोंयकारांचो आधारस्तंभ जावपी गोंयकारां मदीं खरे गोंयकार कोण? नवे मांडावळींतल्यान उतर मेळचें.
दिल्ली ते गल्ली मेरेन भोंवपी प्रदेश भाजपा, काँग्रेसच न्हय आम आदमी पार्टीच्या अध्यक्षांक देश, विदेशांत शिंपडिल्ले गोंयकार मेळटात. गल्फांतले गोंयकार पूत तोखणाय गोंयची करतले, व्हडविकाय सांगतले गोंयकारपणाची. तांचे पासत वेवसाय, नोकरेची गॅरंटी दिवपी येवजण करची पडटली.
2026 ची विधानसभा वेंचणूक झुजा तेंपा वयली, म्हारगायेंत थंडसाण चवथी तेंपार येतली. माराण धाडचे, मारचे न्हय अशें वेंचणूक नेमावळींतल्यान सांगचें पडटलें.
पक्षांतरां फुडारांत खंयच्याच पक्षाक परवडचीं ना, परवडटले “मर्जर”. सत्ता आसा थंय दोमळे न्हय पक्षी उडत वतात चोंब्यानी. चोंबे आडावपाचें शस्त्र, उतर राजकी पक्ष वेंचणुके आदीं दितात उपरांत आडायतलो कोण? झूज आदलें मुख्यमंत्री पदाचें, झूज आतां विरोधी पक्षाच्या मुखेलीपदाचें. राजकी “जनरेशन एन” पिळगी कोण घडयतलो?
प्रदेश भाजपाध्यक्षांनी फातोड्डें सावन विधानसभा वेंचणुकेंत नासतलों हें कळींत केलां. भौशीक बांदकाम मंत्री दिगंबरबाब कामत हांच्या पुताक वाट प्रदेश भाजपाध्यक्ष दाखयत व्हय? मडगांवच्या बाबूदादांचे नातू प्रभव नायक हे भाजपाचेच. आम आदमी पार्टीक मडगांवां ऋषी मेळटले, चिराग नायक हांकां पायलीभर मतां मेळटलीं, उजवाडाची दिका तांकां दिसतलीं.
इतिहास प्रदेश भाजपाध्यक्ष वेंचणुकेंच्या आंगणात देंवून जिखपाचो इतिहास घडोवपी केंद्रीय राज्यमंत्री श्रीपादभाऊ. उपरांत पयलींचे मुख्यमंत्री लक्ष्मीकांतबाब पार्सेकार, राज्यपाल राजेंद्र आर्लेकार. विनयबाब तेंडुलकार आनी खासदार सदानंद तानावडे हांणी तो इतिहास मोडलो. पक्षाचें जैत आपलें मानपी तांकांय गोंयची शीतकडीच भावता. आस आसा तांकांय गोंय विधानसभा वेंचणुकेंत देंवपाची.
काँग्रेसींत प्रदेशाध्यक्षपद सांबाळटना विधानसभा वेंचणूक न जिखपी चड. गड जिखतना शींव ना जातात, वाग वाडटात. आदल्यो मुख्यमंत्री शशिकलाताई काकोडकार हांची भयण ज्योतीताई बांदेकार भाऊच्यो यादी सांगत वेंचणुकेच्या आंगणांत चल्ल्यार इतिहास घडटलो.
गोवा फाॅरवर्डाचे आमदार विजयबाब सरदेसाय गिरीशाचे इश्ट. विजयबाब आनी विरोधी पक्ष मुखेली युरी आलेमांव हांचे इश्टागतींतल्यान विजय काँग्रेसीच्या राज्यांत अध्यक्ष जावंक शकताले. तशीं चिन्नां दिसतना गिरीश परतून प्रदेश काँग्रेसाध्यक्ष जाल्यात. दीस तांकां आनी काँग्रेसीक बरे येतले, कितलेशेच पयलींचे मुख्यमंत्री तांच्या खांद्याक खांदो तेंकयतले. गिरीशान सादूर रावन फुडले पिळगेक येवकार दितना तांचें शिक्षण, जिखपाची तांक पळोवची.
वालंका आलेमांव, अर्चीत नायक, प्रतिमा कुतिन्हो, मडगांव, फातोड्डेंच्यान बीना नायक कुंकळ्ळी मेरेन चलतलीं. लक्ष्मीच्या पावलांनी पुनवेदिसा अंदूंचो राज्य दीस आयलो. संद गिरीशान घेतली परतून कदेलार बसपाची. कदेल बदल्लें पक्षाची निशाणी, कचेरी आसा. कचेरीय धांवतली, नव्या मार्गार 21 जिखपाच्या.

सुहासिनी प्रभुगांवकार
9881099260