भांगरभूंय | प्रतिनिधी
राष्ट्रीय अवकाश विज्ञान परिशदेचें उक्तावण
पणजी, प्रतिनिधी : यदो धर्मा तदो जया म्हणजे ‘धर्म आसा थंयूच जैत आसा’, अशी शिकवण रामायण, महाभारतांतल्यान मेळटा. सनातन धर्म वा धर्मीक ग्रंथान पसून विज्ञान आसा. विज्ञान आनी धर्म हांचे समन्वयानुच समाज तशेंच देशाची उदरगत शक्य आसा. प्रधानमंत्री नरेंद्र मोदी हांच्या फुडारपणा खाला सरकार विज्ञानाक सर्वोच्च प्राधान्य दिता, अशें राज्यपाल पी. एस. श्रीधरन पिल्लई हांणी सांगलें.
ताळगांवच्या डॉ. श्यामाप्रसाद मुखर्जी स्टेडियमाचेर आयज भारतीय अवकाश संशोधन संस्थेच्या (इस्रो) राष्ट्रीय अवकाश विज्ञान परिशदेचें उक्तावण तांणी केलें. उक्तावणाच्या कार्यावळीक उदका पुरवण मंत्री सुभाष शिरोडकार, इस्रोचे अध्यक्ष डॉ. एस. सोमनाथ, इस्रोचे आदले अध्यक्ष ए. एस. किरण कुमार, गोंय विद्यापीठाचे कुलगुरू आनी आयोजन समितीचे वांगडी प्रो. हरिलाल मेनन हाजीर आशिल्ले. 1 मार्च मेरेन चलपी ह्या परिशदेत व्याख्यानां, प्रदर्शन तशेच वैज्ञानिकां कडेन संवादाच्यो कार्यावळी जातल्यो.
भारत ह्या शब्दाचो अर्थ उजवाड (प्रकाश) असो आसा. सनातन धर्म आसू, इस्लामीक धर्मग्रंथ आसू वा येशु ख्रिस्ताची शिकवण आसू, भारतीय समाज बऱ्या विचारांक येवकार दिता. आमच्या देशांत सवधर्मसमभाव आसा. सर्वधर्म समभाव ही शांतिकाय आनी उदरगतीची बुनियाद आसा, अशें राज्यपालांनी सांगलें.
चांद्रयाना सयत तरेकवार मोहीमेक लागून भारत अवकाश तंत्रज्ञान वाठारात संसारात सगळ्यांत फुडें आसा, अशें मंत्री शिरोडकार हांणी सांगलें.
अवकाश मोहिमांवेलो खर्च आनी गरज पटोवन दिवपाचें आव्हान
विज्ञानिक प्रकल्प तशेच अवकाश मोहीमांचेर कोट्यांनी रूपया खर्च जाता. वैज्ञानिक तरेकवार प्रकल्पां खातीर बरोच वावर करता. बरेच खेपो हो वावर सामान्य लोकांक कळा ना. अवकाश मोहीमांचेर जावपी खर्च हो काय जाणाक गरजे भायर जावपी खर्च दिसता. वैज्ञानिकांचो वावर आनी मोहीमांवेलो खर्च पटोवन दिवपाचें आव्हान आसा, अशें इस्रोचे अध्यक्ष डॉ. एस. सोमनाथ हांणी सांगलें.
परिशदेंत देशातल्या विज्ञानिकां सयत उद्देगिक संस्थांचे अधिकारी तशेच विद्यार्थ्यांचो वाटो आसा. रवींद्र भवन, साखळी, राजीव गांधी कला मंदीर (फोंडा) हांगा कार्यावळी जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
