भांगरभूंय | प्रतिनिधी
मडगांव, प्रतिनिधी ः मडगांव- काणकोणां म्हामार्गाचेर धर्मापूरा बिरेस्तारा सकाळीं एक कार, दोन स्कुटरी आनी म्हाल येरादारी टेम्पो मदीं अपघात जाल्लो. तातूंत दोग जाण जखमी जाल्ले. ह्या अपघाता संबंदी कार ड्रायव्हर अब्दुल महम्मद मुसा करीम हाचे आड गुन्यांव नोंद केला.
पुलिसांनी दिल्ले म्हायती प्रमाण ह्या अपघातांत गाडयांचें व्हड लुकसाण जालां. अब्दुल करीम हाणें धर्मापूर बस स्टॉपा लागसार पावतकच भितरल्या रस्त्या वयल्यान येवपी दुचाकी गाडयेक धपको दिलो. मागीर मुखारल्यान येवपी म्हाल येरादारी रिक्शाक धपको दिलो. ह्या अपघातांत मेश्विता फर्नांडीस (21, वागा, चिंचणी) गंभीर जखमी जाल्या आनी तिचेर जीएमसींत उपचार सुरू आसात. जाल्यार रिक्शा चालक कुशेप्पा लमाणी (51, कुंकळ्ळी) होय जखमी जालो.
अपघाता उपरांत ड्रायव्हर अब्दुल करीम हाणें दिल्ले म्हायती प्रमाण, स्कुटर चलोवपी बायलेन रस्त्यार आशिल्ल्या गाडयांचो अदमास करिनासतना रस्तो हुपलो. तिका वांचोवपाचो यत्न करतना म्हामार्गा वयल्या हेर गाडयांचो अदमास चुकलो आनी हो अपघात जालो. ह्या अपघातांत आपल्या हाताक किरकोळ जखम जाल्या. घरकान्नीच्या पांयांक जखम जाल्या. तिका हॉस्पिटलांत व्हेली. तशेंच रिक्शा चालकाच्याय पांयांक जखम जाल्ल्याचें अब्दुल करीम हाणें सांगलें. ह्या अपघाताची म्हायती पुलिसांक दिले उपरांत पुलिसांनी थंय वचून पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
