भांगरभूंय | प्रतिनिधी
भारत-द. आफ्रिका टॅस्ट माळे उपरांत जातलो निवृत्त
नवी दिल्लीः दक्षीण आफ्रिकेचो आदलो टॅस्ट मुखेली डीन एल्गारान टॅस्ट फॉर्मेटांतल्यान निवृत्त जावपाची घोशणा केल्या. आपल्या कारकिर्दींतली निमाणी टॅस्ट मॅच तो भारता आड खेळटलो. एल्गाराची आतां मेरेनची कारकीर्द पर्जळींत आसा. सुमार 12 वर्सांच्या टॅस्ट कारकिर्दींत ताणें 84 मॅची खेळ्ळ्यांत. ह्या काळांत 13 शेंकडे आनी 23 अर्दशेंकडे नोंदयल्यात. 26 डिसेंबर सावन सुरू जावपी भारत आनी दक्षीण आफ्रिका हांचे मदीं जावपी टॅस्ट माळेंत एल्गार खेळटलो. ताची निमाणी मॅच केपटावनांत खेळटलो. ही मॅच 3 जानेवारी सावन सुरू जातली.
क्रिकेट खेळप हें म्हजें सपन सदांच आशिल्लें. म्हजे खातीर सगळ्यांत व्हडली गजाल म्हळ्यार म्हज्या देशाचें प्रतिनिधित्व करपाची संद. 12 वर्सां आपल्या देशा खातीर खेळप हें एक व्हडलें सपन. तो आपल्या कारकिर्दींतली निमाणी टॅस्ट मॅच केपटावनांत खेळटलो. हें म्हजें आवडीचें स्टेडियम, अशें एल्गारान म्हणलें.
भारत आनी दक्षीण आफ्रिका हांचे मदीं दोन मॅचींची टॅस्ट माळ जातली. ताची पयलीं मॅच 26 डिसेंबराक जातली. ही मॅच सेंच्युरियनांत जातली. दुसरी मॅच 3 जानेवारीक केपटावनांत जातली. एल्गाराच्या कारकिर्दींतली ही निमाणी मॅच आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
