भांगरभूंय | प्रतिनिधी
म्हापशें: काँग्रेसीच्या तेन्नाच्या आठ बंडखोर आमदारां आड काँग्रेस पक्ष फुडल्या दोन तीन दिसांनी अपात्रता याचिका दाखल करतलो. कांय म्हायती मेळोवचे खातीर आमी राविल्ले, ताका लागून कळाव जालो. आतां ही याचिका तयार आसा, अशी म्हायती हळदोणेंचे आमदार अॅड. कार्लुस फेरेरा हांणी दिली.
बिरेस्तारा तार बस्तोड्यां एका कार्यावळीचे सुवातेचेर अॅड. फेरेरा पत्रकारां कडेन उलयताले.
खूब खेपे सभापती हो सत्ताधारी पक्षाचो आमदार आसता. पूण सभापतीन सदांच न्याक आनी निश्पक्ष तत्वाचेर निर्णय दिवपाचे आसतात. मुळांत काँग्रेस पक्षाचें विलिनीकरण जावंक ना. पक्षाचो एक ल्हानसो गट दुसऱ्या पक्षांत गेलो म्हणजे पुराय मूळ पक्षाचें विलिनीकरण जालें, अशें म्हणपाक जावचें ना. सभापतीन जर याचिका भायर मारली जाल्यार न्यायालयांत ताका आव्हान दिवन लक्ष विलिनीकरणाची खरी व्याख्या समजून दिवपाची आमची तयारी आसा, अशेंय अॅड. फेरेरा हांणी सांगलें.
मजगतीं, रातीं उसरां मेरेन भौशीक सुवातेंचेर चलपी संगीत कार्यावळींचो लोकांक आनी विद्यार्थ्यांक त्रास जाता. ताचो लोकांचे भलायकेचेर परिणाम जाता. संगीत कार्यावळींचेर निर्बंध घातले म्हणजे पर्यटनाचेर हल्लो अशें कांय जाणांचें मत जालां. हे आदीं गोंयांत रातच्यो उसरां मेरेन पार्ट्यो चलनाशिल्ल्यो, तरी लेगीत बरे पर्यटक येताले. पूण सध्या पर्यटनाच्या नांवान कितेंय चल्लां. लोक रस्त्याचे कुशीक रावून रांदतात, जाल्यार कांय जाण संडासूय करपाक लागल्यात, अशें अॅड. फेरेरा हांणी सांगलें. कायरोचे समस्ये विशीं उलयतना अॅड. फेरेरा हांणी सांगलें, हालींसराक लोक बिनधास्तपणान रस्त्याचे कुशीक कोयर उडयतात. बशींतल्यान तशेंच हेर गाडयेंतल्यान कोयराच्यो पोतयो पुला वयल्यान न्हंयेंत उडयतात. अशे तरेन आमी न्हंयो प्रदुशीत करपाक लागले जाल्यार आमकां सगळ्यांकूच दुयेंसांक फुडो करचो पडटलो. तुमचे कडेन कोयर व्हरपाक कोणूच येना जाल्यार तुमच्या पंचा कडेन, नगरसेवकां कडेन संपर्क करात. गरज पडली जाल्यार थळाव्या आमदारांक विस्वासांत घेयात.
गोंयांत चल्लां तें कसलें पर्यटन?: अॅड. फेरेरा
आदीं दर्यादेगे लागसारच्या घरांनी वा नुस्तेमार भावांच्या घरा पर्यटक रावताले आनी गोंयची संस्कृती समजून घेताले. हें चित्र आतां बदल्लां. सध्या पर्यटक रातभर पार्ट्यो करतात आनी दीसभर न्हिदतात. हें कसलें पर्यटन? पर्यटकांनी गोंयांत येवन गोंयची संस्कृती समजून घेतिल्ली आमकां जाय. सध्या ‘इट, स्लीप, ड्रींक आनी पार्टी’ हो प्रकार सुरू आसा. हें चित्र आमकां नाका, अशें अॅड. फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
