भांगरभूंय | प्रतिनिधी
पणजी : राज्यांतल्या उत्तर आनी दक्षीण गोंय जिल्लो हॉस्पिटलांत ११ जून सावन केमोथेरपी उपचार सुरू जातलो अशी घोशणा भलायकी मंत्री विश्वजीत राणे हांणी केली. जिल्लो पांवड्यार केमोथेरपी सुविधा सुरू केल्ल्यान सहज उपचार मेळटले आनी तातूंत सुदारणांय जातल्यो. हालींच तांणी उत्तर गोंय जिल्लो हॉस्पिटलाक भेट दिली. ह्या वेळार तांणी दोतोर आनी हेर अधिकार्यां वांगडा नियाळ बसका घेतली. बसके उपरांत तांणी ही घोशणा केली.
राणे हांणी सांगलें, सध्या राज्यभरच्या दुयेतींक कॅन्सराच्या उपचारां खातीर ’गोंय वैजकी महाविद्यालय आनी हॉस्पिटलांत’ (गोमेकॉ) वचपाक प्रवास करचो पडटा. दोनूय जिल्लो हॉस्पिटलांनी केमोथेरपीची वेवस्था जाल्यार दुयेतींक चड प्रवास करचो पडचो ना. तशेंच हे सुविधायेक लागून दुयेतींवेलो ताणूय उणो जातलो. जिल्लो हॉस्पिटलांत केमोथेरपी उपचार सुरू जाल्ल्यान, राज्यांतलो कॅन्सर रोग उपचार सेवा अदीक बळीश्ट जावपाक व्हड मजत जातली.
सगल्या अॅम्बुलन्स सेवांचें बेगीनूच १०८ आपत्कालीन प्रतिसाद नेटवर्कांत एकत्रीकरण करतले. एकत्रीकरणाची प्रक्रिया पुराय जाले उपरांत, उत्तर गोंय जिल्लो हॉस्पिटलांत चडांत चड चार अॅम्बुलन्सी कायम स्वरुपाच्यो तैनात करतले. एकसंध अॅम्बुलन्स प्रणाली निर्माण करप, विवीध सेवां मदलें समन्वय सुदारप, मदती खातीर प्रतिसाद वेळ उणो करप आनी राज्यांत आनीक बर्यो आपत्कालीन वैजकी सुनिश्चीत करप, असो निर्णय घेतलो, अशें तांणी मुखार म्हणलें.
ताचे पयलीं राणे हांणी उत्तर गोंय जिल्लो हॉस्पिटलांत नियाळ बसकेंत कर्मचार्यांचें मार्गदर्शन केलें.
मंगळारा सांजेवेळार हॉस्पिटलांत चार वरां लायटीची पुरवण बंद जाल्ल्यान सेवा विस्कळीत जाल्ल्यो. हे फाटभूंयेर हांगच्या सेवा सुविधां विशीं नियाळ बसका घेतली. बरोच वेळ लायट नाशिल्ल्यान दुयेंती, भलायकी कर्मचारी आनी हॉस्पिटलांतल्या प्रशासकांची व्हड गैरसोय जाल्ली.
राणे हांणी हाचे फाटल्यान तांत्रीक इबाड आशिल्ल्याचें सांगलें. तशेंच ह्या इबाडा खातीर जिल्लो हॉस्पिटल प्रशासन जापसालदार नाशिल्ल्याचेंय तांणी स्पश्ट केलें.
सिटी स्कॅन यंत्र
मंत्री राणे हांणी उत्तर गोंय जिल्लो हॉस्पिटल बेगीनूच ’सीटी स्कॅन’ यंत्र हाडटलें अशें तांणी स्पश्ट केलें. ह्या उपकरणा खातीरची ऑर्डर पयलींच नोंद केल्ल्याचेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
