भांगरभूंय | प्रतिनिधी
पणजी : दोनापावला रस्त्यार मंगळारा रातीं उसरां एकल्यान बेशिस्तपणान बीएमडब्ल्यू गाडी चलोवन ईव्ही, स्कोडा रॅपिड आनी थार ह्या तीन गाडयांक धपको दिलो. ह्या प्रकरणांत पणजी पुलिसांनी जगदीश सरदेसाय ( २७, रा. दोनापावला) हाका अटक केली. अटके उपरांत आतां दुबावीत गाडी चालकाच्या वागणुके आड एके आदले घडणुकेंतली पिडेस्त बायल आनी तिचें कुटूंब जाहीरपणान मुखार आयलां. जानेवारींत घडिल्ली एके भिरांकूळ घडणुकेची आपबिती हे पिडेस्त बायलेन प्रसारमाध्यमां मुखार मांडली.
नेमकें प्रकरण कितें?
पिडेस्तान दिल्ले म्हायती प्रमाण, जानेवारींत रातच्या वेळार भूक लागिल्ल्यान हें कुटूंब दोनापावलच्या डोमिनोजा लागसार गाडी पार्क करून पार्सल घेवपा खातीर गेल्लें. पार्सल घेवन करंजाळे वटेन वचपा खातीर जेन्ना तांणी गाडयेचो इंडिकेटर दाखोवन यु-टर्न घेवपाचो यत्न केलो तेन्ना मुखारच्यान सामकी वेगान एक बीएमडब्ल्यू गाडी आयली. आपघात जावचो न्हय म्हणून पिडेस्त कुटुंबांतल्या चालकान गाडी जाग्यारूच थारयली. देखून तीं वाटवलीं.
गाडी थारोवनय मुखारच्यान आयिल्ल्या बीएमडब्ल्यू ड्रायव्हरान आक्रमक जावन वाद घालपाक सुरवात केली. ताणें ह्या कुटुंबाच्या गाडयेचे विंडो मिरर फोडले. गाडयेंत बशिल्ल्या चालकाचेर एका फाटल्यान एक धुमके, थापटां मारून हल्लो केलो. ह्या हल्ल्यांत गाडयेंतल्या चालकाचे तकलेक आनी शरिराक दुखापत जाली. दुबावीत इतल्यारूच रावूंक ना. तो परत आपले गाडयेंत गेलो आनी थंयच्यान धारेचें शस्त्र (सुरो) घेवन हल्लो करपा खातीर धांवलो.
पुलीस स्टेशनांत धांव आनी सुटका
बीएमडब्ल्यू चालक हातांत शस्त्र घेवन येता तें पळोवन गाडयेंतलें कुटूंब सामकें भियेलें. तांणी प्रसंग वळखून गाडी चालू केली आनी थंयच्यान सरळ पुलीस आवटपोस्ट कडेन व्हेली. पुलिसांनी घडणुके सुवातेर पीसीआर व्हॅन धाडली आनी पिडेस्तांची वैजकी तपासणी करून घेवन नॉन-कॉग्निझेबल गुन्यांव दाखल केलो.
न्यायाची मागणी
हे घडणुकेक लागून आमचें फकत शारिरीक लुकसाण जावंक ना, आमकां मानसीक ताणाकूय तोंड दिवचें पडले, अश्यो भावना पिडेस्त बायलेन उक्तायल्यात. सामान्य नागरिकांक रस्त्यार सुरक्षितपणान वावुरपाक मेळचें, हे खातीर ह्या तरणाट्याचेर खर कायदेशीर कारवाय जावची, अशी मागणी आतां पिडेस्त कुटुंबान केल्या.
रातचो त्रास
गोंयांत रातच्या वेळार सोरो, ड्रग्साचे नशेंत हेडपी तरणाट्यांचो आंकडो वाडला. तांचे गाडयेक मात्शी बसून आडखळ जाली वा सामको सादो अपघात जालो तरी ते आक्रमक जातात आनी मारामारी करपाक धांवतात, अशें एका तरणाट्यान सांगलें. ते तिडकतात काय तांचें मानसिक संतुलन इबाडलां, हाचो पुलिसांनी तपास करचो, अशी मागणीय ताणें केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
