भांगरभूंय | प्रतिनिधी
पर्यटन मंत्री रोहन खंवटे हांचे हस्तुकीं नांव तकट्याचें अनावरण
भांगरभूंय प्रतिनिधी
पणजीः गोंयांतल्या पर्यटन मळाक उर्बा दिवपाक सरकाराचे यत्न सुरू आसात. ते खातीर सरकार विवीध प्रकल्प आनी उपक्रम राबयत आसा. तेच फाटभुंयेर दोनापावला जेटी स्वदेशी दर्शन येवजणे खाला विकसीत करून ती लोकां खातीर उक्ती केल्या. हाका लागून पर्यटन मळाक उर्बा मेळटली. पर्यटन मंत्री रोहन खंवटे हांचे हस्तुकीं जेटीचें लोकार्पण जाले.
ह्या वेळार तांचे वांगडा नगरसेवक नेल्सन काब्राल, पर्यटन खात्याचे अधिकारी दीपक नार्वेकार आनी हेर पदाधिकारी हाजीर आशिल्ले.
राज्यांतले पर्यटन वर्साचे बाराय म्हयने चालू उरचे, आनी तातूंतल्यान अर्थवेवस्थेक गती मेळची हे खातीर पर्यटन खातें वावर करता. राज्यांतल्या पर्यटनाक उर्बा मेळपाक सगल्यांच्या सहकार्याची गरज आसा. ते खातीर सगल्यांनी एकठांय येवन काम करपाक जाय. थळावे सरपंच, पंच वांगडी, आमदार हांचो तेंकोय गरजेचो. उदरगती वांगडाच लोकांच्यो समस्या सुटाव्यो करपाचो आनी रोजगार उपलब्ध करप हे खातीर सरकाराचें धोरण आसा, अशें रोहन खंवटे हांणी सांगलें.
आतां जेटीचेर प्रवेश करपाक शुल्क
गोंयकारां खातीर मुफत, पर्यटकां खातीर शुल्क
दोनापावला जेटीचेर प्रवेश करपा खातीर आतां पर्यटकांक प्रवेश शुल्क फारीक करचें पडटलें. 18 वर्सां सकयल भुरग्यांक 25 रुपया जाल्यार 18 वर्सां वयल्यां नागरिकां खातीर 50 रुपया शुल्क आसतलें. जाल्यार थळाव्यांक जेटीचेर प्रवेश करपाक मुफत प्रवेश आसतलो, अशी म्हायती दिवपी तकटो थंय लायला.
ग्रामीण पर्यटन विकसीत करतले
स्वदेश दर्शन येवजणे खाला ग्रामीण पर्यटन विकसीत करपाचेर सरकार भर दितले. गांवागांवांनी जायतीं अशी थळां आसात, जी पर्यटन थळां म्हूण फामाद येवपाक शकतात. बेगिनूच स्वदेश दर्शन येवजणे खाला ह्या थळांच्या उदरगती खातीर मोहीम राबयतले. ते खातीर प्रधानमंत्री नरेंद्र मोदी हांचोय आमकां तेंको मेळटा, अशें रोहन खंवटे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
