भांगरभूंय | प्रतिनिधी
आयपीसी खाला गुन्याव नोंद करप अन्यायकारक थारतलें
पणजी, प्रतिनिधी : जीएमसींत डॉ. शुभम प्रभुदेसाय हांकां जाल्ले मारपेट प्रकरणांत पुलिसांनी गोंय वैजकी सेवा कायदो 2013 च्या कलम 4 आनी 5 खाला गुन्यांव नोंद करचो, अशी मागणी भारतीय वैजकी संघटणेच्या गोंय फाट्यान केल्या. ही कलमा अजामीनपात्र आसात आनी 3 वर्सां ख्यास्त वा 50 हजार रूपया तालांवाची तजवीज आसा. भारतीय दंड संहितेच्या कलम 504, 352, 186 आनी 353 सोडून गोंय वैजकी सेवा कायद्याखाला गुन्याव नोंद करचो, अशी आयएमएची मागणी आसा.
भारतीय वैजकी संघटणेच्या (आयएमए) गोंय फाट्याचे अध्यक्ष डॉ. संदेश चोडणकार हांणी पत्रका वरवीं ही मागणी केल्या.
जीएमसीच्या वॉर्ड 142 मदीं दोन बायलांनी डाॅ. प्रभुदेसाय हांकां मारपेट केली. आगशी पुलिस ठाण्याचेर हे विशीं गुन्यांव नोंद जाला. पुलिसांनी भारतीय दंड संहिते खाला गुन्याव नोंद केला. दोतोराक मारहाण जावप ही गंभीर घडणुक आसा. ड्युटी करताना दोतोरांक संरक्षण मेळपा खातीर गोंय वैजकी सेवा कायद्या खाला गुन्याव नोंद करपाची मागणी संघटणेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
