भांगरभूंय | प्रतिनिधी
एकल्याक कोलव्यां जाल्यार दुसर्याक बागा वाटायलो
मडगांव, प्रतिनिधी : कोलवा दर्यादेगेर गस्त घालतना पर्यटक पुलिसांनी जीव रक्षकांचे मजतीन पर्यटक बायलेक उदका भायर काडून तिचो जीव वाटायलो.
दर्यादेग वाठारांत पर्यटक नेम पाळीनात. ताका लागून सुरक्षिततायेचे फाटभूंयेर हे नेम आनीक खर करपाची गरज आसा. दक्षीण गोंयांत आदल्या काळांत बुडून मरण आयिल्ल्या घडणुको वाडल्यात. ताका लागून दक्षीण गोंय जिल्होधिकारी तशेंच जिल्हो दंडाधिकारी हांणी घसघसो, तळीं, न्हंयां सयत, चिरेखाणींतल्या उदकांत पेंवपाक वचपाक बंदी घाल्या. तशेंच मामलेदार, पुलिसांक हाचेर लक्ष दवरपाचे निर्देशूय दिल्यात. मान्सून राज्यांत दाखल जाल्ल्यान हवामान खात्यान दोन दीस रेड अलर्ट जारी केला. हे फाटभूंयेर पर्यटकांक हे विशीं सुचवण्यो दितात, मात पर्यटक ताचे कडेन आडनदर करून उदकांत देंवतात.
आयतारा दनपरां सुमार १२ वरांचेर लखनौच्यान भोंवपाक आयिल्ली नॅन्सी वर्मा (२४) ही कोलवा वेळेर उदकांत देंवली. उदकाचो अदमास येवंक नाशिल्ल्यान ती बुडपाक लागली. त्या वेळार पर्यटक पुलीस कॉन्स्टेबल निखिल नायक, चेतन गावडे, मोहम्मद असिफ आनी श्वेता देविदास हांणी धांव मारून जीवरक्षक किशन नायक आनी समीर वेळीप हांचे मजतीन तिका वाटायली.
बागा दर्यादेगेर पर्यटकाक वाटायलो
बागा दर्यादेगेर पर्यटक पुलीस विक्रम गावस, साहिल पळ हांणी जीवरक्षक सुरज निंबाळकार आनी सिद्धेश भोसले हांच्या सहकार्यान उदकांत बुडपी तरणाट्याक वाटायलो. हुबळीच्यान आयिल्ल्या ह्या पर्यटकाचें नांव सिद्धार्थ कमाडोली (२४).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
