भांगरभूंय | प्रतिनिधी
पणजी : फुडल्या म्हयन्यांत आपूण राज्यांतल्या दोंगराळ वाठारांनी पदयात्रा करतलों. ह्या वेळार आदिवासी भावांच्यो कांय समस्या आसल्यार त्यो जाणून घेतलों आनी राज्य सरकाराच्या सहकार्यान त्यो सोडोवपाचो यत्न करतलों, अशें राज्यपाल पी एस श्रीधरन पिल्लई हांणी सांगलें. शुक्रारा राजभवना वतीन कॅन्सर आनी डायलेसिसच्या दुयेतींक अर्थीक मजत दिवपाचे कार्यावळींत ते उलयताले.
पदयात्रे खातीर उत्तर आनी दक्षीण गोंयांतल्यो स ते सात सुवातो वेंचून काडल्यात. हांगच्या कांय रानांतल्या वाठारांनी रस्ते ना. खंयचेय व्यक्तीक तांच्या घरा मेरेन पावपा खातीर रस्तो आसप गरजेचें. मात हांगा रस्ते बांदपा खातीर कांय कायदेशीर आडखळी आसात. आपूण राज्य सरकाराचे मजतीन हो प्रस्न सोडोवपाचो यत्न करतलों. तशेंच हांगच्या आदिवासींच्यो हेर समस्याय जाणून घेतलों, अशें राज्यपाल पिल्लई हांणी मुखार सांगलें.
राजभवना वतीन फाटलीं तीन वर्सां कॅन्सर वा डायलेसिसचेर आशिल्ले २३०० दुयेंती तशेंच वैजकी सेवा दिवपी १०० संस्थांक ५.५ कोटी रुपयांची अर्थीक मजत केल्या. ह्यान पयलीं राज्यपाल ह्या नात्यान हांव राज्यांतल्या सगळ्या पंचायतींनी वचून आयलां. हांगच्यो समस्या जाणून घेतल्यात. गरजेच्या सुवातांचेर अर्थीक मजतूय केल्या. राजभवना वतीन ह्यान फुडेंय अशे लोको उपेगी उपक्रम चालूच उरतले, अशें तांणी सांगलें.
आपल्या संविधानान राज्यपाल, न्यायालयां वा हेर कोणाय परस जनता सर्वोच्च हें स्पश्ट केलां. ताका लागून पदाचेर आशिल्ल्या सगळ्या व्यक्तींनी जनतेची सेवा करप गरजेचें. आमकां गोंयांत राजभवन, लोकभवन करपाचें आसा. राजभवन सामान्य लोकांक कायमचें उक्तें करचें, हे विशीं आमी सरकारा कडेन उलोवप करतात. हांगच्या वाठारांत बेगीनूच सुश्रुत आनी चरक हांचे पुतळे बसयतले अशें राज्यपालानी सांगलें.
लोकांची सेवा करपाक पिराय म्हत्वाची आसना. राज्यपाल पदाची मुदत सोंपल्या उपरांत हांव निवृत्त जातलों. हांव परत वकिली सुरू करून लोकांची सेवा करतलों, अशें राज्यपाल पिल्लई हांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
