भांगरभूंय | प्रतिनिधी
निलेश काब्राल हस्तुकीं उत्तर आनी दक्षीण गोंय बालकल्याण समितीच्या वांगड्यांचो भोवमान
मडगांव: भौशीक बांदकाम मंत्री निलेश काब्राल हांणी आमच्या देशाच्या आदर्श आनी सक्षम संविधानाची तोखणाय करून देशाचे उदरगती खातीर दरेका नागरिकान आपलें योगदान दिवपाचें असो उलो मारलो. ते मडगांवां दक्षीण गोंय जिल्होधिकारी कार्यालय प्रकल्पांत आयोजीत प्रजासत्ताक दीस सुवाळ्याक राष्ट्रीय तिरंगो हुबयल्या उपरांत उलयताले.
मंत्री काब्राल हांणी फुडें म्हणलें, जर आमकां आमचें राष्ट्र आनी घटमूट आनी खुशालभरीत करपाचें आसल्यार आमी उदरगतीचे प्रक्रियेंत योगदान दिवपाक जाय. तशेंच आमी संविधानीक नेम आनी कर्तव्यां पाळपाक जाय. आमी येरादारीचे नेम, नितळसाण हीं कर्तव्यां लेगीत पाळपाक जाय.
भारतीय राज्यघटनेन समाजांत धर्मनिरपेक्षताय आनी समानतायेची निती जपल्या. आयज भारत देशान प्रधानमंत्री नरेंद्र मोदी हांच्या फुडारपणा खाला संवसारांत अर्थवेवस्था आनी समाजीक मळार उंचेली सुवात मेळयल्या.
मुख्यमंत्री डॉ. प्रमोद सावंत हांच्या फुडारपणा खाला गोंय सरकारान राज्याचे उदरगतीक घटसाण दिवपा खातीर केल्ल्या यत्नांची आनी उपक्रमांचीय तांणी तोखणाय केली. मुख्यमंत्री डॉ. सावंत हे राज्याचे उदरगती खातीर बरेच परिश्रम घेतात अशेंय काब्राल हांणी सांगलें.
ह्या वेळार बाल कल्याण म्हालांतल्या असामान्य योगदाना खातीर उत्तर आनी दक्षीण गोंय बालकल्याण समितीच्या वांगड्यांचो भोवमान केलो. तशेंच लोकांची प्रामाणिकपणान सेवा करपी दक्षीण गोंय जिल्होधिकारी कार्यालयांतल्या सुरक्षा रक्षकांचोय भोवमान केलो.
सुवाळ्यांत मडगांवच्या दामोदर हायस्कूल, भाटीकार इंग्लिश हायस्कूल आनी जिम्नॅस्टिक्स ट्रेनींग सेंटराच्या भुग्यांनी कवायती आनी सांस्कृतीक कार्यावळ सादर केली. काणकोणच्या जवाहर नवोदय विद्यालयाचे विद्यार्थी, मडगांव वाठारांतल्या शाळांचे विद्यार्थी आनी पुलीस पंगडाचे संचलन वांटेकार जालें.
आमदार आलेक्स सिक्वेरा, आलेक्स रेजिनाल्ड, उल्हास तुयेंकार, मडगांवचे नगराध्यक्ष दामोदर शिरोडकार, उपाध्यक्ष दिपाली सावळ, जिल्होधिकारी ज्योती कुमारी आनी हेर अधिकारी हाजीर आशिल्ले.
अनिल पै हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
