भांगरभूंय | प्रतिनिधी
पणजी: पं. जवाहरलाल नेहरू हांच्या यत्नांक लागून देशांतल्या शिक्षणीक, वेवसायीक, अर्थीक मळाची बुन्याद पडल्या. तांचे दूरदृष्टीक लागून देशाची उदरगत जाली. मात भाजप सरकाराच्या फाटल्या बारा वर्सांच्या काळांत देशाची अधोगती जाता. देशाक परतून उदरगतीच्या मार्गार व्हरपाचें आसल्यार पं. नेहरूंचे विचार गरजेचे आसात, अशें कॉंग्रेस प्रदेशाध्यक्ष अमित पाटकार हांणी सांगलें. नेहरूंचे पुण्यतिथी निमतान पणजे आयोजीत कार्यावळींत ते उलयताले. ह्या वेळार पक्षाचे पदाधिकारी हाजीर आशिल्ले.
खूब गिरेस्त कुटुंबांत जल्मल्ल्या नेहरुंनी देशाच्या स्वातंत्र्य लढ्यांत व्हड योगदान दिलें. तांकां जायते फावट बंदखणींतूय वच्चें पडलें. स्वातंत्र्य मेळ्ळे उपरांत नेहरू जेन्ना प्रधानमंत्री जाले तेन्ना देशांत एक सुय पसून तयार जायनाशिल्ली. नेहरूंनी उद्देग आनी अन्न क्षेत्र चालीक लागपी उपक्रम सुरू केले. भौशीक मळावेले उपक्रम (पीएसयु) स्थापन केले. आयआयएम, आयआयटी, एम्स सारकिल्ल्यो संस्था निर्माण केल्यो. ते एक दूरदर्शी नेतृत्व आशिल्ले. मात आयज भाजप सरकार एका फाटल्यान एक पीएसयु विकता, असो आरोप तांणी केलो.
भाजप सरकार देशाची मालमत्ता खाजगी कंपनींक दिता. भाजपाचे मंत्री तशेंच प्रधानमंत्री जनता वा पत्रकारां कडेनूय संवाद सादनात.
ते जनतेचे प्रस्न, समस्यां विशीं गंभीर नात. नेतृत्व शिक्षीत नासल्यार देशाची अधोगती जाता. अशा वेळार पं. नेहरुंचें काम आमी लक्षांत दवरून तातुंतल्यान प्रेरणा घेवप गरजेचें, अशें तांणी सांगलें.
भाजप फुडारी सध्या देशांतले खंयचेय समस्येक नेहरूंकच जापसालदार धरतात. ही हांसपा सारकी गजाल आसा. भाजप फुडार्यांनी पयलीं नेहरूंचें ‘डिस्कवरी ऑफ इंडिया’ हें पुस्तक वाचचें अशें पाटकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
