भांगरभूंय | प्रतिनिधी
पर्वरे छत्रपती शिवाजी महाराजांच्या पुतळ्याचें अनावरण
म्हापशें: एक विधान, एक प्रधान, एक निशाण आनी अखंड भारत हें छत्रपती शिवाजी महाराजांचें सपन प्रधानमंत्री नरेंद्र मोदी हांणी चालीक लायलें. नवभारत, आत्मनिर्भर भारत निर्माण करपा खातीर आनी खऱ्या अर्थान शिवशाही, शिवराज्य आनी रामराज्य हाडपा सयत विश्वगुरू भारत करपा खातीर मोदी हांचें हात घटमूट करून लोकांनी तांकां तेंको दिवचो अशें आवाहन मुख्यमंत्री डॉ. प्रमोद सावंत हांणी केलें.
शिवजयंतीचें औचित्य सादून पर्वरे 21 फूट घोड्यार बशिल्ल्या छत्रपती शिवाजी महाराजांच्या पुतळ्याचें अनावरण केले उपरांत मुख्यमंत्री उलयताले. ह्या वेळार केंद्रीय मंत्री श्रीपाद नायक, राज्यसभा खासदार सदानंद शेट तानावडे, पर्यटन मंत्री रोहन खंवटे, नुस्तेमार मंत्री नीळकंठ हळर्णकार, आमदार अॅड. कार्लूस फेरेरा, सरपंच स्वप्नील चोडणकार, सोनिया पेडणेंकार, जिल्हो पंचायत वांगडी कविता नायक, गुरुप्रसाद पावसकार, पर्यटन खात्याचे अधिकारी आनी हेर मानेस्त हाजीर आशिल्ले.
गोंयांतलो भव्य असो छत्रपतींचो घोड्यार बशिल्लो पुतळो पर्वरे साकरला. मंत्री रोहन खंवटे हांचे हे खातीर अभिनंदन. शिवाजी महाराज हांणी सगल्या धर्मांक आनी जातींक एकठांय हाडून सुशासन दिलें. पुर्तुगेझांचे जुलमी राजवटींत गोंयांतली उध्वस्त जावपी देवळां छत्रपतींनी गोंयांत केल्ल्या प्रवेशाक लागून वाटावलीं. एकूय देवूळ मोडचे नात वा धर्म परिवर्तन करचे नात अशी शिटकावणीच शिवाजी महाराजांनी पुर्तुगेझांक दिल्ली. हें शिवाजी महाराजांचें गोंयकारां खातीर मोटें कार्य आशिल्लें. छत्रपतींचें राज्य महाराष्ट्रा पुरतेंच मर्यादीत नाशिल्लें. जाल्यार गोंय, कर्नाटक आनी केरळ हांगाय तांणी परकी राजवटी आड खर लडो दिलो अशें मुख्यमंत्री डॉ. प्रमोद सावंत हांणी मुखार उलयतना सांगलें.
ह्या वेळार खासदार सदानंद शेट तानावडे, मंत्री रोहन खंवटे हांणी मनोगत उक्तायतना शिवाजी महाराजांच्या कार्याची म्हायती सांगली. सरपंच स्वप्नील चोडणकार हांणी येवकार दिलो.
शिवशाहीर नंदेश उमप, मुर्तीकार प्रशांत खेडेकार आनी जोजफ लोपीस हांचो मुख्यमंत्री डॉ. प्रमोद सावंत हांचे हस्तुकीं भोवमान केलो. शिवशाहीर नंदेश उमप आनी वांगडी कलाकारांनी शिवरायांची शौर्यगाथा ही कार्यावळ सादर केली. पुतळो अनवरण सुवाळ्या पयलीं ढोल, ताश्यांच्या गजरांत मिरवणूक काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
