देशभक्तीचें राजकारण

भांगरभूंय | प्रतिनिधी

…. तरीयपूण देशभक्तीच्या आधाराचेर आपली सत्ता तिगोवपा खातीर रशियेच्या पुतीनान आयज युक्रेनांत झूज पेटयलां.

पाकिस्तान व्याप्त काश्मिराचो प्रांत काबीज करपाक आमची सेना तयार बसल्या, फकत सरकारच्या आदेशाची तितली वाट
पळयतात, अशें विधान हालींच उत्तर सेना कमांडर लेफ्टनंट जनरल उपेंद्र द्विवेदी हांणी केल्ले. त्या अनुशंगान एके अभिनेत्रीन लडाखांत चीनाच्या अतिक्रमणाची याद करून दिली तेन्ना सेनेचो अपमान केल्ल्याचो आरोप लायत देशभक्तांनी तिचेर समाज मीडियांतल्यान वायट उतरां आनी गाळयांचो शिंवर केलो. तिच्या वक्तव्यान सेनेचो अपमान कसो जाता, हें मात कळना. प्रधानमंत्री मोदी हांणी म्हणलां तशें जर देशाचे भूमीत कोणीय भितर सरलो ना, जाल्यार चीनी सेनेन फाटी सरचें हाचे खातीर दोनूय वटेनच्या सेना कमांडाच्या अधिकाऱ्यांक आठ- आठ, धा- धा वरां भासाभास करपाची मुळांत गरज कित्याक पडची, असो प्रस्न उप्रासता.
आमचे दुस्मान राष्ट्र पाकिस्तान ‘पाक- व्याप्त काश्मीर’ आनी चीन ‘अक्सई- चीना’चो प्रांत गिळून बसलां आनी तो मेळोवपाक जाय हातूंत दुमत ना. आयज देश स्वातंत्र्याच्या अमृतकालांत पावला आसतना ह्या साडे सात दशकांनी अदीं मदीं तो भाग मेळोवपाचो हाचे विशीं सरकारां, राजकारणी कृतीविना वायफळ बडबड करीत आयल्यांत.
दोनूय प्रांत लेफ्ट. जनरल उपेंद्र व्दिवेदीच्या कमांडा खाला येतात. पाक व्याप्त काश्मीर घेवपाक सेना तयार बसल्या तर अक्सई चीन मेळोवपा खातीरची तयारी खंय मेरेन पावल्या ह्या प्रस्नाचोय जवाब तांणी दिवचो पडटलो.
काँग्रेस केंद्रांत सत्तेत आसतना मोदी चीनाक तांबडे दोळे दाखयात म्हूण उपदेश दिताले. स्वता प्रधानमंत्री जाले उपरांत मात शी जिनपींगाक साबरमतींत झोपाळ्याचेर धोलयलो, महाबलीपूरमांत अख्खो गांव ढोल बडयत तांचे मुखार नाचोवन तांकां आडसराचें उदक पिवयले. मोदी हांणी चीनांतल्या हुवान शारांत जिनपींगा वांगडा च्याचो आस्वाद घेतलो. चीन गलवान आनी लडाखाचे भागांत घुसले उपरांतूय तांबडे दोळे तर दाखयले नाच, चीनचे नाव घेवन निशेध परगटावपाचें धाडसूय दाखयलें ना. पाक व्याप्त काश्मीर होवूय चीनव्याप्त जाल्लो आसा, ही आयची वस्तुस्थिती. ह्या भागांतल्या ‘बेल्ट एंड रोड’ प्रकल्पा खाला चीनान अब्जावधी डॉलरांचो निवेश केल्ल्या प्रकल्पांचीं कामां चालू आसात. हें सगळें घडटालें तेन्ना आमचं सरकार विरोध करनासतना मुकाट्यान बशिल्लें. आयज पाकव्याप्त भाग मेळोवपाक पाकिस्तानूच न्हय तर चीना वांगडाय झूज करचें पडटलें ही वस्तुस्थिती कमांडर व्दिवेदीक खबर आसतलीच. पाकिस्तानाक बुद्द शिकोवपाच्यो, पाक व्याप्त काश्मीर घेवपाच्या घोशणांतल्यान घडये मतदारांची देशभक्ती उचंबळावन वेंचणुकांत फायदो मेळोवपाचो इतलोच मर्यादीत उद्देशूय आसुये. पाकिस्तानांत केल्ल्या सर्जिकल स्ट्रायकाचो भरभरून उल्लेख प्रधानमंत्री मोदी धरून भाजपाच्या सगळ्या फुडाऱ्यांनी ताचे उपरांत जाल्ल्या वेंचणूक प्रचार सभांनी केल्लो आमी पळयला.
सेना, सरकार हांकां असहज करपी कुस्तार प्रस्न कोणेय नागरिकान विचारले उपरांत ताच्या विरोधांत सत्तापक्ष कार्यकर्ते, राजकारणी तरंगा नाचोवपाक लागतकीच अक्षय कुमार, अनुपम खेर, परेश रावल, के. के. मेनन, अशोक पंडित सारकिल्ल्या ‘सरकारी’ देशभक्तांक भार भरता आनी तेवूय खुबळटात. असल्या सेवे बदलाक तांकां सरकारा वतीन राज्य सभा सांसद, सांस्कृतीक संस्थांची अध्यक्षपदां बहाल जातात. अनुपम खेर आनी कॅनडाचो नागरिक अक्षय कुमाराच्या सिनेमांक टॅक्स फ्री सवलत मेळटा.
देशभक्तीचो पेटंट घेवन बशिल्ले राजकी पक्षाचे, विशिष्ट संस्थांचे गट देशभक्तांनी कशे वागप, कितें उलोवप, खावप, कशें न्हेसप, खंयचीं पुस्तकां वाचप, पदां गावप हें थारावपाक लागल्यात. देशाचे प्रधानमंत्री आनी सत्तापक्षांतले महाजन म्हणल्यार देश…. आनी तांच्या धोरणांक, वक्तव्यांक विरोध करपी, ते सगळे देशविरोधी अशी संकल्पना सद्या लोकशाय प्रजातंत्रात रूजयल्या. जनहिताचे सगळे मुखेल मुद्दे कुशीक दवरून सरकार, सत्तापक्षाक विरोध करतल्यांक ‘देशद्रोही’ थारावन ह्या मुद्द्याचेर ध्रुवीकरण घडोवन सत्ता हातासपाचें राजकारण हालींच्या तेंपार वेंचणूक प्रचारांत आमी पळयतात.
अति महत्वाकांक्षी राजकारणी सत्तेत तिगून रावपाक अतिरेकी देशप्रेम समाजांत पातळायतात हें इतिहासांत पळयलां आनी आतां वर्तमानांतय पळयतात. हिटलर आनी जर्मनांच्या अतिरेकी देशप्रेम आनी इतर वंशियाच्या दुस्वासान युरोपांत रक्तखेंव जालो. साडे चार कोटी लोकांक मरण आयले. देड कोटी रशियन मेले. तरीयपूण देशभक्तीच्या आधाराचेर आपली सत्ता तिगोवपा खातीर रशियेच्या पुतीनान आयज युक्रेनांत झूझ पेटयलां.
देशभक्तीचे नागरिकांक धडे दिवपी सरकार आनी राजकी पक्षांक देशाचे सुरक्षे विशी प्रस्न विचारप देश विरोधी थारना. शस्त्र खरेदी व्यवहारांत काँग्रेस युती सरकारांचेर बोफोर्स तोफो, आगुस्ता वेस्टलेंड हेलिकॉप्टर खरेदी प्रकरणांत तर भाजप युती सरकाराचेर दास्सों कंपनीच्या रफाल फायटर जेट खरेदींत कमिशनखोरीचे आरोप लागल्यात. राष्ट्रीय सुरक्षेच्या कारणान तपासांतली अपारदर्शिता वा सरकारी नियंत्रणा खाला काम करपी सीबीआय, ईडी सारकिल्ल्या तपास यंत्रणाच्या मर्यादांक लागून तपास योग्य तरेन जावंक नाशिल्ल्यान तार्कीक निश्कर्शा मेरेन पावपाक असली राजकी भ्रष्टाचाराची प्रकरणां अपेशी थारल्यांत.
सेना, देशभक्ती हांचो राजकी सुवार्था खातीर धोल बडोवपी आमदार, सांसद, मंत्री, राजकारणी, आपल्या भुरग्यांक राजकारणांत हाडटात वा व्हडल्या संस्थांच्या सचीव, अध्यक्षपदांचेर वा कंपनींनी व्हडल्या हुद्याचेर बसयतात. सेनेंत दाखल जातात ते मध्यमवर्गीय आनी गरीब तबक्यांतले तरणाटे. सैनिकांची भलायकी आनी सन्मान सरकार कशें राखता तें पळोवया. सरकारान हालीं अग्निवीर येवजणे खाला देशाची सेवा करपाक उत्सुक आशिल्ल्या तरणाट्यांक चार वर्सा मुजतीचे काँन्ट्रेक्ट कामगारांच्या वळेरींत हाडून बसयले. हाचो अर्थ फुडारांत देशाक सुरक्षा दिवपी सैनिकांक बढती, भलायकी सेवा, भविश्य निधी, निवृत्त वेतन हांची सुरक्षा दिवपा विशीं सरकार गंभीर ना, असो जाता. जम्मूंत पाकिस्तान शिमेर तैनात जवान तेज बहादूर यादव हाणें तांकां दितात त्या उण्या प्रतीच्या जेवणाचो विडिओ वायरल केल्लो. शिस्तभंगाचे कारण मुखार करून ताका सेवेंतल्यान बडतर्फ करपा इतलो गंभीर तो गुन्यांव नाशिल्लो. लेफ्ट. जनरल व्दिवेदीन दुसऱ्या देशा आड झूज करपा विशीं भाश्य करप हो ताचे परस कितलेशे पटीन गंभीर शिस्तभंग. प्रधानमंत्री, संरक्षण मंत्री हांणी असल्या संवेदनशील विशयाचेर भाश्य करपाचें आसता. ताची सरकार गंभीर दखल घेना हाचो अर्थ सरकारच्या मर्जीतल्या अधिकाऱ्यांक सेनेत वेगळी वागणूक मेळटा, असो जाता. नेपाळच्या सेनाप्रमुखाक डोकलामांत चीनच्या अतिक्रमणा विशी प्रस्न विचारिल्लो तेन्ना ताणें म्हणिल्ले, “आमचें काम सरकार सांगता तेन्ना झूज करपाचें. विदेशी धोरणाचेर भाश्य करपाचे काम जनतेन वेंचून हाडिल्ल्या सरकाराचें.” झूज सोंपले उपरांत सैनिकांचो जागो हो बंकरात, तांणी राजकरणांत पडचें न्हय, हो संकेत आमचे सेनेनूय पाळप गरजेचो.

दीपक लाड
पर्वरी