भांगरभूंय | प्रतिनिधी
घुंवळे वखदां प्रकरणांत केल्ली अटक
पणजी: गोंय पुलिसांच्या गुन्यांव फांट्यान 19 ऑक्टोबर 2022 दिसा हणजूण्यां दिनेश कॅफे आनी ताच्या धनयाच्या घराचेर धाड घालून 18.50 लाख रुपया मोलाचें वेगळ्यावेगळ्या प्रकारचे ड्रग्स जप्त केल्ले. ह्या प्रकरणांत गुन्यांव फांट्यान 31 ऑगस्ट दिसा अटक केल्ल्या देविदास नायक हाका न्यायालयान एक लाख रुपया आनी हेर अटीचेर सशर्त जामीन मंजूर केलो. हे विशींचो आदेश पणजेंतले अतिरिक्त सत्र न्यायाधीश बॉस्को रॉबर्टस हांणी दिला.
गुन्यांव फांट्याच्या पंगडान 19 ऑक्टोबर 2022 दिसा सकाळीं 10.50 ते सांजवेळा 4 वरांच्या सुमाराक हणजूण्यां दिनेश कॅफेचेर धाड घालून देविदास नायक हाका ताब्यांत घेतिल्लो. त्या वेळार ताचे कडल्यान 12 लाख 50 हजार रुपया मोलाचो 1.3 कील चरस 35.56 ग्राम 86 अॅक्टसी टेब्लेट्स, 3.84 ग्राम एमडीएमए आनी 2.20 ग्राम एलएसडी लिक्वीड जप्त केली. 1.22 लाखांची रोखूय जप्त केल्ली.
ह्या प्रकरणांत उपनिरिक्षक गिरीस पाडलोस्कार हांचे कागाळी वेल्यान तेन्नाचे निरिक्षक नेथन आल्मेदा हांणी देविदास नायक हाचे आड गुन्यांव दाखल करून अटक केल्ली. उपरांत न्यायालयान ताची जामिनार सुटका केल्ली. त्याच वेळार गुन्यांव फांट्याच्या दुसर्या पंगडान देविदासाच्या प्रेईझवाडो हांगासरल्या घराचेर धाड घाल्ली. थंय ज्योती नायक हिका ताब्यांत घेवन घराची झडटी घेतली तेन्ना 6 लाख रुपया मोलाचो 1.2 कील चरस आनी 1.77 लाखांची रोख रक्कम सांपडली.
ह्या प्रकरणांत तेन्नाचे निरिक्षक विश्वजीत चोडणकार हांचे कागाळी वेल्यान निरिक्षक नितीन हळर्णकार हांणी दुबावीत ज्योती नायक हिचे सयत देविदास नायक, दिनेश नायक आनी कालिदास नायक ह्या चार भावंडां आड गुन्यांव दाखल केल्लो.
ह्या प्रकरणांत गुन्यांव फांट्यान त्या वेळार ज्योती नायक हिका अटक केल्ली. उपरांत तिची न्यायालयान जामिनार सुटका केल्ली. ह्या प्रकरणांत गुन्यांव फांट्यान 31 ऑगस्ट 2024 दिसा देविदास नायक हाका अटक केल्ली. उपरांत ताणें न्यायालयांत जामीन दाखल केलो तेन्ना न्यायालयान ताका एक लाख रुपया आनी हेर अटीचेर सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
