देवाची भक्ती

भांगरभूंय | प्रतिनिधी

कांय जाण देवाक भांगर अर्पण करतात. पूण त्या सर्वव्यापी शक्तीक कितेंय दिवपाची तांक आनी योग्यताय आमचे कडेन आसा?

मनशाक जिवीत खिणयाळें आनी कांय गजाली आपल्या हातांत ना हें जेन्ना होलमलें, तेन्ना ह्या ब्रह्माडांत एक शक्त आसा हाची जाणविकाय जाली. तेन्ना सावन आयज मेरेन, म्हणल्यार 21 व्या शेंकड्यांत लेगीत मनीस अडी-अडचणींत देवाक उलो मारता, सांगून घेता, जप करता. पूण मनीस ही भक्ती भितरल्यान करता काय मेजून मापून?
कांय लोक देवाचो जप करतात. पयलीं जपमाळ घेवन करताले. आतां यंत्र आयलां. जप करतना मेजपाक कित्याक जाय? 101च जावपाक जाय? 100 वा 99 वा 102 जाल्यार? हें मेजप कित्या खातीर? बाजारांत वचून अर्द कील, एक कील अशें मेजून हाडटात ते भशेन वेव्हार कित्याक? जप मेजिनासतना करात, देवाक भक्ती जाय, आंकडे नाका.
पुजा करतकच आमी देवाऱ्यांतल्या देवाक फुलां घालतात. आपल्या बागेंतलीं फुलां घालतात. पूण जांय जाण दुसऱ्याचीं फुलां सकाळीं फुडें चोरतात आनी देवाक घालतात. हें योग्य? तुमच्या बागेंत एक दीस फुलां ना जाल्यार देवाक कळटा. ते खातीर दुसऱ्यांचीं फुलां चोरचीं न्हय. गीतेंत एक श्लोक आसा— 9 व्या अद्यायांत 26 वो श्लोक, जाचो अर्थ असो, जो निर्मण मनान आनी भक्तीन म्हाका पानां, फुलां, फळां वा उदक ओंपता ती भेट हांव मोगान घेतां. गीतेंत सांगलां, देवाच्या पांयां कडेन उदकाचो एक थेंब लेगीत घाल्यार जाता. पूण तो श्रद्धेन घालपाक जाय. तशेंच याद दवरपाक जाय जांच्या बागेंतलीं फुलां चोरल्यांत, त्या घरांतल्या लोकांनी आपल्या देवारांतल्या देवाक खंयचीं फुलां घालप?!!!
आमच्या देशांत ‘वार’ करपाची प्रथा आसा. चडशे लोक सोमार आनी बिरेस्तार करतात. शिवराक रावतात. एखादी आंगवण केल्या जाल्यार कांय जाण अमूक एक वार करतात. कांय जाण खऱ्याच श्रद्धेन करतात, पूण थोडे टॅक्निकल जातात. म्हणल्यार रातचीं 12 जायसर शिवराक रावप. उपरांत तो वेळ वतकच दुसरो दीस जाल्ल्यान, नुस्तें वा चिकन खावप. एखाद्या शिवराक दिसा खायन दिसता जाल्यार खायात. मनांत इत्सा दवरप आनी 12 जावपाची वाट पळोवप अशीं धोंगीपणां म्हणल्यार भक्ती न्हय. देवाक प्रामाणीक वृत्ती आवडटा.
आपल्या तांकी भायर जें आसता, तें जाय जातकच मनीस देवाक सांगून घेता. देवाक शरण वता. आनी काम जातकच आपल्या तांकी प्रमाण अर्पण करता. कांय जाण देवाक भांगर अर्पण करतात. पूण त्या सर्वव्यापी शक्तीक कितेंय दिवपाची तांक आनी योग्यताय आमचे कडेन आसा? देवाक जाय नितळ भक्ती. आपूण तसोच दुसरो ही भावना मनांत दवरप, मनीसपण जपप. पूण असो भक्त जावप कठीण. भांगर दान करप सोंपें.
एक चारोळी वाचिल्ली. तिचो अणकार असो. उश्ट्या बोरांचो अर्थ लावचो तसो लागता, खरो श्रीराम मात उश्टीं बोरां मागता.
खरेंच, देवाक दिखावो नाका. फक्त निसुवार्थ, नितळ भक्तीच जाय.

संपदा कुंकळकार
9850149319