भांगरभूंय | प्रतिनिधी
शिवोलेचे सेवाभावी दोतोर दत्ता नायक हालींच भायर पडले. तांकां ओंपिल्लीं हीं आर्गां. –
आयतारा 21 ऑगस्टाक सकाळीं एक वायट खबर कानार पडली. शिवोलेचे नामनेचे दोतोर दत्ता नायक हांची प्राणज्योत पालवली. ही खबर आयकताच मन एकदम सुन्न जाले आनी भूतकाळांत गेले. आमचे फॅमिली दोतोर म्हूण दोतोर नायकाक हांवे भुरगेपणातल्यान पळयला. म्हापशेच्या सिरसाट बिल्डीगेंत तांचें क्लिनीक आशिल्लें. सकाळीं शिवोलीच्या सगळ्या दुयेंतींक तपासून दोतोर मात लेगीत विसव घेनासतना रातचे आठांक तर केन्ना केन्ना णवांक सुद्दा म्हापशेच्या क्लिनिकांत पावताले. तांका मेळूंक म्हापशेंच न्हय तर कळंगूट, हळदोणें, अस्नोडें, थिवी, हणजुण, पर्वरीचे लेगीत दुयेंती येताले. केन्ना केन्ना तांकां सगले दुयेंती तपासून घरा शिवोले पावपाक रातचीं एक वा देड पसून जातालीं. तरी लेगीत तीन वरांची न्हीज पुराय करून ते फांतोडेर पाचांक उठून आपल्या घरा आयिल्ल्या दुयेंतींक तपासताले.
डाॅ. नायक दुयेंतींक तपासपाचें काम व्हडा खोशयेन आनी आपलेपणान करताले. त्या वेळार तांची फी फकत पांच रुपया आशिल्ली. दुयेंतींची तपासणी तर तें बारीकसाणेन करताले आनी ताचेर बेगीन बरें जावपी वखदांय दिताले. तांचे उलोवप लेगीत एकदम नम्रतायेचें. म्हज्या बाबाक तर तांचो हात लागल्यारूच पुरो आसलो. तांच्या हातांत जादू आसा, अशें बाबाक दिसतालें. सदांच तांच्या हातगुणाची ते तोखणाय करताले. तांचो हात लागल्यारूच दुयेंस पयस जाता अशे आमकांच न्हय तर चडश्या दुखणेकारांक दिसतालें. लोक तांकां मेळपाक आनी रोगाचें निदान करपाक पयसूल्यान येताले. फांतोडच्या पांचांकूच आपलो नंबर लावपाक लोक तांच्या क्लिनिका फुडें गर्दी करताले.
दोतोराचो पेशो जनसेवेचो आसा, अशे डाॅ. नायक मानताले. तांचे बापूय, चुलते लेगीत दोतोर. तांचे पूत, सून, धूव आनी नातरांय दोतोर आसात. जनसेवीची कास तीं फुडें व्हरत आसात. येदी व्हड नामना मेळून दोतोर नायक हांणी केन्नाच कोणाक तापयल्ले वा दुखयल्ले हांवें तरी आयकूंक ना. केन्ना केन्ना तांचो ड्रायव्हर दुयेंतींचेर तापतना हांवें पळयला, पूण दोतोराचो उंचेलो आवाज केन्ना आयकलो ना. गरीब लोकां कडेन पयशे नासल्यार लेगीत ते तांकां फुकट तपासून आपलीं वखदां फुकट दिताले. तांची फी पांच रूपया, वीस रूपया आनी पन्नास रूपयाकून एक रूपया लेगीत वाडली ना. नाजाल्यार आताचे दोतोर बेश्टो हात लायल्यारूच हजारांनी रूपया फी घेतात. कोणें फी दिली ना जाल्यार ते कांयच म्हणनासले. आपल्याक फकत तुमचो आशिर्वाद दियात, अशें ते सांगताले. लोक तांका भरभरून आशिर्वाद दिताले. अशे हे देवमनीस मेळप ही आयच्या युगांत खूबूच अप्रुपाची गजाल.
एकदा म्हापश्यांसून शिवोली घरा वतना रातची कोणें तरी तांची गाडी आडावन तांकां लुटले. आनीक कोण जाल्यार त्या भिरातीन रातचे आसू अशे म्हणून येवचे नासले. पूण, दोतोर नेमान म्हापश्यां येतालेच. तांकां घरचीं सगलीं मोगान ‘दादा’ म्हणटालीं. तांची धूव बीना ही म्हजी इश्टीण. केन्ना केन्ना फोनार हांव दोतोर नायक हांची खबर घेतालें. फाटींच शिवोले गांवांत तांचो भोवमान जाल्लो. त्या भोवमानाक शेकड्यांनी लोकांनी हाजीर रावन तांचे वयलो मोग उगतायलो. कोवीडाच्या फाटल्या दोन वर्सां तांणी मातसो सुशेग घेतिल्लो, पूण उण्या प्रमाणान ते दुयेंताची तपासणी करताले. तांच्या बऱ्या कर्मान तांकां मरणूय बरें आयले. अश्या ह्या देवमनशाक म्हजो प्रणाम.
अरूणा राजेश पाटणेकार
दिवचल
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
