भांगरभूंय | प्रतिनिधी
मडगांव, प्रतिनिधी : बोर्डा फातोर्डा वाठारांत बुधवारा सकाळीं प्लास्टीकचे पोतयेंत एका देड म्हयन्याच्या भुरग्याक उडयल्ल्याचें कळून आयलें. ता उपचारा खातीर हॉस्पिटलांत व्हेलें. हे विशीं पुलिसांनी केल्ले चवकशे वेळार दुबावीत प्रियांका फर्नांडीस (३०, रा. मूळ चंदगड, महाराष्ट्र) हिका अटक केली. भुरगें कुटुंबाचेर वजें आशिल्ल्याचे भावनेन हें केल्ल्याचें तिणें चवकशे वेळार सांगलें.
हे विशीं चड म्हायती प्रमाण बुधवारा सकाळीं बोर्डा फातोर्डा उक्ताडार एक भुरगें उडयल्ल्याची म्हायती फातोर्डा पुलिसांक मेळ्ळी.फातोर्डा पुलिसां वांगडा पिंक फोर्सचे पुलीस घडणुके सुवातेर आयले. तेन्ना एका घराच्या फाटल्यान पांचव्या रंगाच्या प्लास्टिक पोतयेंत भरून सुमार देड म्हयन्याच्या भुरग्याक उडयल्ल्याचें दिसलें. पिंक फोर्सच्या बायलां पुलिसांनी रोखडेंच भुरग्याचे वैजकीय तपासणी खातीर दक्षीण गोंय हॉस्पिटलांत ताका दाखल केलें.फातोर्डा पुलिसांनी केल्ले चवकशेंत हें भुरगें थंयच लागींच रावपी फर्नांडीस कुटुंबियांचें आशिल्ल्याचें समजलें.पुलिसांचे चवकशेंत घरांतले व्यक्ती सारकी म्हायती दिना जाले. पुलिसांनी खोलायेन चवकशी केली तेन्ना भुरग्याचे आवयन गुन्यांवाची कबुली दिली. उपरांत तिका पुलिसांनी ताब्यांत घेतली.
दुबावीत प्रियांका फर्नांडीस हांणी पुलिसांक दिल्ले म्हायती प्रमाण, हें उडयल्लें भुरगें देड म्हयन्याची चली जावन आसा. मुजती पयलींच डिलिव्हरी जाल्ल्यान ह्या भुरग्याक कांय वैजकी समस्या आशिल्ल्यो. ताका लागून हें भुरगें आपल्या कुटुंबाचेर वोजें आशिल्ल्याची भावना प्रियांका हिच्या मनांत आयली. ताका लागून आपणें हें भुरगें उडयल्ल्याची म्हायती तिणें दिली. ह्या प्रकरणांत फातोर्डा पुलिसांनी भुरग्याक उक्ताडार उडयल्ले खातीन आनी भुरग्याच्या जिवाक धोको निर्माण केल्ले खातीर गोंय बाल संरक्षक कायद्या खाला गुन्यांव नोंद करून प्रियांकाक अटक केली. पुलीस निरीक्षक नाथन आल्मेदा हांच्या मार्गदर्शना खाला बायलां पुलीस उपनिरीक्षक रियांका नायक, अमिन नायक, अतिकेश खेडेकार हांचे सयत पिंक फोर्सच्या पुलिसांनी तपासांत वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
