भांगरभूंय | प्रतिनिधी
डॉ. अनिशा पिनेरोः काणकोणां स्वयंपूर्ण मित्रां वांगडा आपमजत गटांची बसका
भांगरभूंय । प्रतिनिधी
काणकोणः पंचायत वाठारा वांगडाच नगरपालिका वाठारांतूय लोकांक गोरवां सांबाळ खात्याच्यो कितलेश्योच येवजण्यो आसात. पालिका वाठारांतल्या लोकांनी बोकड्यो पाळप आनी दूद उत्पादन अशा वेवसायांनी देंवचें, अशें काणकोणच्या गोरवां सांबाळ कार्यालयाची डॉ. अनिशा पिनेरो हांणी सांगलें.
चार रस्तो वाठारांतल्या आपत्कालीन आसरो घराच्या सभाघरांत स्वयंपूर्ण मित्रां वांगडा आपमजत गटांची बसका आयोजीत केल्ली. ते बसकेंत सरकाराच्या विवीध येवजण्यांची म्हायती दिवपी पत्रकां हाजीर आशिल्ल्यांक भेटयली. ह्या वेळार डॉ. पिनेरो उलयताली.
ह्या वेळार माचयेर नगराध्यक्ष रमाकांत नायक गांवकार, केपेंचे उपजिल्होधिकारी आनी काणकोण पालिका वाठाराची स्वयंपूर्ण मित्रत शर्मिला गांवकार, रान खात्याचे उपरानपाल जी. वारके आनी सचीन हाजीर आशिल्ले.
कोयर हें ‘वेस्ट’ न्हय जाल्यार ‘रिसोर्स’ आसा. टाकावूंतल्यान टिकावू वस्तू कश्यो करपाक मेळटा तें ह्या वेळार राजस्थानाच्या सौध्या कला फावंडेशनाची संध्या मिंथल हांणी सांगलें. तशेंच घरांत उण्यांत उणो कोयर कसो करपाक मेळटा हे विशींची म्हायती दिली. आयज वैजकी कोयर ही गंभीर समस्या जाल्या, अशेंय तांणी सांगलें.
ह्या वेळार जाल्ले चर्चेंत नगरसेवक हेमंत नायक गांवकार, सायमन रिबेलो, संजय कोमरपंत आनी अजीत पैंगीणकार हांणी वांटो घेतलो. ह्या वेळार नगरसेविका नितू देसाय आनी हेर बायलो हाजीर आशिल्ल्यो. रमाकांत नायक गांवकार हांणी येवकार दिलो. पालिका वाठारांत कोयरा संबंदांत घेतात त्या उपायां विशीं म्हायती दिली. प्रेसी फर्नांडीस हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
