भांगरभूंय | प्रतिनिधी
पणजी : दूदसागर घसघसो अंदूं १ जून सावन पर्यटकांचे येरादारी खातीर बंद आसतलो. तसो आदेश उत्तर गोंय वन्यजीव, पर्यावरण आनी पर्यटन विभागाचे उपवनसंरक्षक हांणी जारी केला. भगवान महावीर राष्ट्रीय उद्यान, मोलेंचो दूदसागर घसघसो पर्यटन सर्कीट वाहनांचे येरादारी खातीर बंद उरतलो, अशें आदेशांत म्हणलां.
मोलेच्या दूदसागर घसघश्या कडेन पर्यटक आकर्शीत जाता. पावसांत लाखांनी पर्यटक ह्या घसघश्याक भेट दितात. मात, फाटल्या कांय वर्सां सावन हांगा पर्यटक बुडपाच्यो घडणुको घडटात. तशेंच हो वाठार रानांतल्या जनावरां खातीर आरक्षीतूय आसा. हाची दखल घेवन पावसाच्या हंगामांत हांगा पर्यटकांक घेवन वचपी जिपींचेर बंदी घाल्या. अंदूंय अशीच बंदी उत्तर गोंय रानजीव, पर्यावरण आनी पर्यटन विभागाचे उपवनसंरक्षक हांणी जारी केल्या. फाटल्या वर्सा ११ जून २०२३ सावन ही बंदी घाल्या. उपरांत १५ ऑक्टोबरांक ती काडिल्ली. मात, अंदूं मान्सून वेळार सुरू जावपाचे संकेत आसात. ताका लागून १ जून सावन बंदी लागू केल्या. ही बंदी केन्ना सोंपतली हें आजून स्पश्ट जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
